孖男演員扮熱戀勁尷尬 林欣彤諗話題帶動氣氛

林欣彤推出新歌《重光紀念日》，拍攝MV時她四處遊走，查實有苦自己知，皆因拍攝當日天氣不穩定，關機前夕更下過雨，以至叢林路面相當濕滑，加上導演要求高，為求靚景不惜「攀山涉水」。林欣彤直指拍攝該MV有難度：「嗰日嘅路唔單止跣，仲好難行，所以我要用好多腰力同腳力去平衡。拍完後條腰足足痛咗兩、三日，要狂拉筋先至冇咁痛。同埋因為有部份鏡頭要配合後期，我要KEEP住幻想自己係追逐緊啲螢火蟲，但同空氣做戲有時真係好迷失，所以好多時要導演親自指導。」

除了叢林拍攝考驗演技及體力，林欣彤與男主角的對手戲亦是「耐力大作戰」，她謂：「咪睇我哋鏡頭前咁親密，其實我哋唔係好熟，但因為拍攝行程好趕，半日要走成4、5個地點，我哋焗住冇時間warm-up就要扮熱戀。起初都好尷尬，後來用『頭臭』做話題，後尾都成功帶起咗話題同氣氛。」

為配合角色，導演不時要求林欣彤做出撒嬌表情及動作，問到她私底下多唔多撒嬌？她笑稱：「我唔知自己係點，但我屋企兩隻狗仔成日向我撒嬌，佢哋啲眼神簡直殺死我。可能真係對得多，我啲熟朋友睇完個MV後，都話我撒嬌嘅眼神好似我屋企嘅狗仔『二佬』。」