歌迷排隊買紅館騷門票捱斬 華仔心痛哽咽：大家注意安全

劉德華將於12月開20場跨年紅館騷，門票於下月4日開售，日前已陸續在歌迷到公開發售地點排隊。不過今日凌晨一名內地中年漢在柴灣青年廣場城市售票網售賣點排隊輪候期間，被兩名男子斬傷，另有排頭位的黃姓青年曾被兩名男子滋擾。
華仔拍片開腔回應傷人事件，哽咽的他表示內心不舒服，只想歌迷開心睇騷，希望警方保護市民。

華仔說：「Hello我係華仔，今日我聽到一個好唔開心嘅消息，聽完事件好唔開心好唔舒服，其實我希望喜歡我支持我嘅朋友能夠平平安安去購買我嘅演唱會飛，開開心心嚟睇我嘅演唱會。我知道每個有關嘅單位佢哋都花咗好多時間去諗，我亦都知道好難會有一個好完美嘅解決方法，所以喺呢段時間裏面，我哋會盡量去再跟進呢件事，呢段時間希望警方兄弟姊妹多加巡邏，能夠保護所有市民；亦當市民喺排隊過程裏面如果感覺到安全有問題，就要報警。再一次希望大家喺排隊過程裏面保持冷靜，注意自己安全，你嘅安全就係令到我開開心心表演畀你睇嘅最大動力，多謝。」