證無綫冇搵過做港姐 曾志偉自爆遭封殺原因：累積，禍從口出

曾志偉現身「香港人撐香港品牌」3周年活動擔任嘉賓，亦是他被指遭無綫封殺後首度現身。問為何曬得一身古銅膚色？志偉笑說：「入正題啦！唔好講埋啲無謂嘢喇！（真係想知你做乜咁黑？）周圍搵嘢做囉，俾人封殺，唔使搵嘢做咩！世界難撈，唔係想做就有得做。」問到可有求證是否被封殺？他笑說：「我信報道嘅，我唔知，不過就係無搵我。」
提到Viutv及亞視搶著邀請他，志偉笑說：「報道嚟啫！我仲係求緊職。」至於有不少市民留言支持他繼續擔任港姐司儀，志偉說：「唔係想做就做，不過係想做好嘅節目畀觀眾睇。（陳百祥話你阻住晒啊！）所以咪畀佢做囉。我出於好意，今年真係諗過返去做，不過可能format唔同咗，所以無搵我。（即係從來無搵你？）係，都無叫我去澳門影相。（都戥港姐開心可以衝出香港去澳門？）梗係，好過去西貢啊！」

問到是否因為亮相ViuTV或是西貢論以致遭無綫封殺？志偉笑說：「累積！禍從口出。」提到亞視有意邀請他參與亞姐，他笑說：「睇吓啦！我真係有打畀何麗全，都打唔通，想問候佢同恭喜佢。佢咁多兼職，要關照吓。」ViuTV也有類似選美節目《廣告女皇》，他笑說：「港姐都唔做，做呢啲會俾人笑。其實節目邊度做都OK，最緊要係好節目。TVB又唔係真係無得做嘅，2035年啦，等佢換晒啲人先。」（攝影：張家宜）