捕捉囡囡轉身咬手指 楊潮凱：好有影寫真feel

藝人楊潮凱捱咗咁多年，近年終於捱出頭。為無綫效力多年的他，近年參演過《與諜同謀》、《不懂撒嬌的女人》、《使徒行者2》等重頭劇，事業漸上軌道。不過在今年3月升呢做老竇的楊潮凱心目中，囡囡的地位才是最重要。一向有玩開攝影的他，經常搵囡囡做模特兒，更將靚相上載到社交網與網友開心Share添。近日他又將親手影的囡囡正面照放上網，並留言話：「呢個BB今日可以自己轉身喇！點解可以咁勁㗎？原來見到佢做到呢個動作係會好感動㗎！#呢個pose好有影寫真feel#Catharine#咬手指係咩玩法」囡囡轉一轉身已經可以令他開心大半天，所以囡囡係爸爸的前世情人呢個講法真係冇講錯！照片一出，網友都大讚楊潮凱囡囡好可愛，更叫他以後要影多啲「小情人」的相片同大家分享咁話！