釗峰拍MV眼淚鼻涕一齊流

梁釗峰作為C AllStar休團後首位單飛成員，第1首主打歌當然精心打造，誠邀郭偉亮（Eric Kwok）和黃偉文（Wyman）携手創作新歌《月亮不代表我的心》。為了宣傳新歌，釗峰連日來走訪全港30多個辦公室玩busking造勢，在同步推出的MV中，他化身「梁教授」以眼淚醫心病。他說：「平時啲朋友和Fans都嫌我講嘢長氣又多道理，嗌我『梁教授』，喺新歌MV我索性幽自己一默，化身教授收集眼淚，幫助別人發洩情緒。」

釗峰稱在感性的MV中演得尷尬，「每個人生理反應都唔同，而我喊嘅時候係流鼻水先過眼淚，加上最近唔係好夠瞓，鼻水比較多、顏色又唔靚，拍MV嗰陣幾乎變咗《喜劇之王》周星馳咁大篤鼻水跌出嚟，好尷尬！」C AllStar每次開騷釗峰例必第1個爆喊，他卻否認是「喊包」：「我喺台上比佢哋3個冷血友易喊，但平時未必係我喊先，尤其是睇戲我好少喊。」

談到創作班底，釗峰表示在C AllStar時代與Wyman合作無間，一直希望第1首獨唱作品交由對方操刀製作，而Eric Kwok就是第1次合作，原來釗峰睇中其性格，他謂：「我係典型處女座，乜都好緊張、性格繃緊。好想知道碰到雙魚座嘅Eric會點？佢畀我感覺好型、好冷靜，希望呈現另一個我，令人有唔同嘅感覺。」