《逆緣》似大家庭 林夏薇望原班人馬拍續集

林夏薇出席《逆緣》慶功飯局，對於劇集收視高達30點表示很開心，非常值得慶祝。問為劇集學日文如此辛苦都值得？她說：「都唔係嘅，都好想做好每一件事；一套劇有好收視，要靠大家團體努力，真係好似一個大家庭咁，好努力做好呢份工作，拍嘅時候好有默契。」可希望收視之冠可維持到年尾？她說：「希望啦！依家先6月，希望可以繼續守落去。」她跟拍擋陳家樂已先後都宴請台前幕後食飯，亦不約而同有意再做東。她笑說：「佢（陳家樂）依家咁紅！佢賺多咗好多錢啊！咁我都好戥佢開心。」
已進入休息狀態的林夏薇，被問是否正努力造人？她說：「咁又未！因為之前時間比較密啲，依家終於有時間陪屋企人，陪吓先生，我覺得有多啲時間已經好好。」至於有提議原班人馬再拍續集，她說：「都想嘅，雖然我話咗要調理咗身體先，但係無論做咩都好，有機會再合作都係一件好開心嘅事。」（攝影：朱偉彥）