準新人不滿結婚照只付$3000 攝影師拆穿使「高招」反多收$7000

結婚是人生大事，婚紗相更是重中之重，但過去不時有準新人與攝影師爭執。有婚禮攝影師稱遇到「狗男女」新人，他們於Whatsapp收到婚紗相照片後表示不滿，樓主唯有只收取3000元出場費。由於婚紗照都經壓縮才傳送，新人疑兩日後發現，遂「死死氣」問樓主可否給他們部分照片，樓主則指已刪除他們所有照片，要修復便需多付7000元，新人最終無奈接受。樓主直言「想呃呀叔我？下世啦！」
該網民昨晚在討論區發帖，題為「頭先差啲被對新人呃」。他從事婚禮攝影師向來公道，「影得好先收，唔好我最多收3000出場費，其他我一蚊都唔收」。但他早前遇到一對新人經Whatsapp收到婚禮照片後，表示「一張都唔掂」。
樓主批評「明明果幾十幅絕對正常，但對新人唔收貨 」，唯有只收3000元作罷。他又說，「我都知對乞兒想點，9成係Whatsapp收完相Download（下載）後扮唔鐘意，唔想畀尾數。」但他形容自己「阿叔我都唔係食齋」，因他早已調整了照片的大小，又將它們壓縮至幾十kb，「 電話唔放大都幾靚，但ipad開就連對眼都睇唔到。」
樓主續說，該對新人兩日後發現自己「中伏」，「死死氣咁問我可唔可以畀返10幅8幅佢」。但他稱已刪除他們所有照片，並指他們沒有付款，他可以隨意處理，結果新人見狀「急到瀨晒屎打幾次畀我」。樓主初時也拒絕接聽電話，但最後亦回覆新人指，可嘗試修復照片，但他們需額外支付7000元，新人最終無奈接受。樓主最後稱「我咁就收咗對狗男女1萬蚊，想呃阿叔我？下世啦！」。
帖民引來不少網民熱議，有人讚樓主高招，而且懂得保護自己，批評涉事新人「幾千都想慳」，最終得到教訓是「大快人心」。但有人認為，事件是一名自以為拍照不錯的大叔，被新人「彈」後以他們的照片要脅「掠水」，不過亦有人反駁，「咁都叫掠水？咁樓主應該企硬啲唔好畀對新人」。