傘兵Look谷演嘢會 陳志雲笑王喜演技樣貌平庸

陳志雲以綠色傘兵造型出席記者會，宣佈7月舉行《志雲尋志雲登陸舞台演嘢會》，還狂擺甫士拍照，甚至瞓低典地，被擔任司儀的王喜笑問：「做乜典地？你又唔係溫碧霞。」陳志雲即作狀打王喜，笑謂：「我心情高漲，興奮又刺激嘛。」看到王喜要手持司儀稿，陳志雲即連環窒對方，「做了咁多年司儀仍要偷睇貓紙，我對你真係好失望，你喺無綫做得唔好，到商台又做一陣就走，現在喺有線，希望唔會拖累有線。」

陳志雲表示演嘢會每晚的內容及表演嘉賓不同，表演嘉賓有曾俊華、田北俊、陶傑、謝安琪、張繼聰、張敬軒及黎耀祥等，有鑑於黎耀祥曾為其涉貪案作供，陳志雲亦稱與黎耀祥的關係很深長。王喜就問到：「他長還是我長？」陳志雲笑謂要視乎不同的角度和功能性。

記者笑王喜呷醋，陳志雲繼續發功「褒祥貶喜」，「王喜幾好戲呀，不過他好戲都唔及黎耀祥，當年劇集《緝私群英》由王喜做男一，但他乳臭未乾都唔知憑乜，同譚小環兩件都唔識做戲；同劇的黎耀祥就做三線角色，所以很戥對方不值。王喜樣貌平庸，演技又一般，當年他說其寫真集賣斷市，可能出得5本，就是他一家5口買晒。」陳志雲又稱已要求王喜操肌，以便屆時在台上騷肌。

提到綠色傘兵Look，陳志雲稱化妝要兩個鐘，落妝也要個半鐘，特別以這個「雷霆傘兵」造型示人，就是代表要為自己的理想向前衝，他亦會百分百付出、毫不保留、無所不談、言無不盡，希望觀眾會有反思。至於主題「尋」的意思，是尋找自己、工作、愛情。登「六」的陳志雲又指雖有云60歲是一個關口，但當年邵逸夫爵士也是60歲才開始做TVB。陳志雲續透露為演嘢會推出主題曲，笑言要憑此曲奪「叱咤生銹鐡奬」，扮「叱咤生力軍奬」，並指：「我不求門票秒殺，只求月殺，我係『金盆開口』，但如果門票賣唔晒，就要跟黃子華『金盆𠺘口』了。」