【金像奬】毛舜筠打定輸數飛日本散心變慶祝 親自下廚7日7夜答謝支持

《第37屆香港電影金像獎頒獎典禮》完滿結束，一眾得獎者出席慶功宴。憑電影《黃金花》奪得「最佳女主角」的毛舜筠（毛姐），事後笑言未有致電老公報喜，她未看過電話，但相信老公不會等她返家才睡覺，又指同行幼女也為她得獎好開心並感到驕傲。
對於獲封影后，毛姐坦言作為演員覺得好圓滿，入行有42年，10年前也奪得「最佳女配角」。她說：「開始時凌文龍得到最佳新演員獎項，我已經激動得好緊要，當時覺得好滿足啦！因為他是新人，覺得拎到個獎，前路會好行點，就算我無獎都唔緊要。他拎完獎仲話我一定會得獎，我自己唔想諗，後來見到鏡頭影住我，但我好驚宣佈唔係我，就會一臉失望會睇晒，所以無望過螢幕。」

談到黃秋生於頒獎禮上暗串成龍「中國電影」論，她說：「我唔知，我遊緊魂！心情太緊張。」完成法國藍帶廚藝課程的毛姐，笑言只要在金像獎曾經投下一票給她，就會親自下廚7日7夜。她說：「我明日去日本，原本諗住輸咗當去散心唔好諗，依家贏咗就慶祝，等我返來後，我會屋企中門大開，過咗7日就無得吃㗎！我最拿手將法國菜煮叉燒，總之乜都有。」