【靚聲王】側田路過Jam《三十日》 陳康健感激支持

《超級巨聲》出身的陳康健去年獲無綫續約，不時在劇集中有演出，可惜歌手路發展平平。擁有一把靚聲的他自覓出路，近年在街頭玩Busking，自彈自唱騷才華，昨日他到赤柱Busking巧遇側田，側田都有拍片放上網，聽到陳康健唱著他的《三十日》，抱著狗狗的側田都點晒頭、豎起手指公讚好。

側田聽聽吓更走埋去同陳康健Jam歌，兩把靚聲演繹《三十日》，令人聽出耳油，加上有原唱者加持，網民勁讚「聽到起雞皮，好聽到爆 」、「真係正到暈，吉他版好正」。亦有網民留言支持陳康健，「加油，覺得你進步咗」、「唱歌好好聽，唔知仲以為原唱者唱緊」。