【寶馬失控】捱撞後表現鎮定 抱B少婦：我對腳冇咗！幫我睇吓個女有無事

荃灣一輛寶馬房車疑失控鏟上行人路，軋斷一名女途人雙腳腳掌。現場消息指，女傷者當時正抱著一名僅數個月大的女嬰，她遭遇車禍後表現鎮定，忍痛向一名男親友表示「我對腳無咗，幫我睇吓個女有無事」。

消息指，該名女傷者當時慘被夾在私家車車頭及電箱之間，她未有哭喊，表現鎮定。傷者的兩名親友隨後趕至現場了解情況，期間女傷者向親友查問女兒狀況，指「我對腳冇咗，幫我睇吓個女有無事」。據悉，女嬰並無受傷，已經由到場的親友帶走照顧。

事發於早上11時35分，肇事的寶馬私家車沿荃灣梨樹路行駛，駛至梨木樹邨附近時，突然失控鏟上行人路，撞倒走避不及的女事主。女事主昏迷送瑪嘉烈醫院搶救。救護員將在現場檢獲的截肢一併送院。現場消息稱，由於女事主腳掌嚴重受傷，左腳掌未能駁回，須進行切除手術。至於右腳掌亦因嚴重潰爛，須切除一部分。

多名親友趕抵醫院探望，有親友擔心痛哭，有人跪地禱告。警方事後拘捕36歲寶馬男司機，涉危險駕駛導致他人身體受傷。消息指，寶馬車廂內有數張交通罰款告票。