杏兒「又有咗」？鬆身衫上陣惹疑雲

胡杏兒與老公李乘德(Philip)結婚後，誕下兒子李奕霆（Brendan），上個月頭剛剛過咗百日宴，而且囝囝仲十分識做，係情人節親親媽咪，真係睇見都冧！
不過囝囝出世後，兩公婆要忙住搵奶粉錢，杏兒都要調理身體，兩公婆都好耐無出遊，近日二人終於有得一齊撇甩囝囝，去泰國參加朋友婚禮，仲有唔少外遊靚相添。

不過其中一張相就惹來網友追問，杏兒係咪「又有咗」，相中杏兒一身跌膊長身杏色裙，裙擺好飄逸，老公企係隔離，搭住杏兒膊頭，老公仲一身白恤衫灰褲加肩帶，風度翩翩，難怪杏兒自己都話「很美和感動的婚禮，每一次參加婚禮都會想起自己的。」
就係杏兒呢張相，呢條杏色長裙，個肚有少少凸起，就惹起網民疑問啦！不過再仔細睇，其實杏兒着緊高踭鞋，而且前幾日先PO過一張瑜伽倒立嘅相，杏兒個肚有定冇，一眼睇晒啦！