黃子華太緊張不敢請人睇首映：驚嘔膽汁

黃子華、佘詩曼（阿佘）、張繼聰及鄭詩君（C君）出席電影《棟篤特工》首映禮，C君笑問子華有幾多片酬？子華笑言片酬多過C君兩倍，但他入行30多年，對方只有3年，後浪推前浪。認為C君可做接班人？子華說：「點止接我班，希望C君下次做埋幕後，捧紅我同阿佘。」C君即搭嘴問子華是否投資？子華即謂嘟姐（鄭裕玲）好有錢。問到C君有否寸會他？子華說：「唔係寸！係鍾意，有火花的對話。我好鍾意佢，係盲目嗰隻。」
在旁的阿佘笑言當然鍾意C君，因為人又好兼口才好又可愛，而且請她打邊爐，不過就比較大汗。問到轉數會否不及子華和C君而接不住？阿佘說：「我轉數都好快㗎！佢哋對我好好。（邀請了家人來首映禮？）請來媽媽。」子華笑謂阿佘轉數快排第一，C君則第二，自己排第三，只不過阿佘不表現出來，又自言不敢請任何人來首映禮，因為心理太緊張，但有朋友會包場睇戲，不過他不會陪伴入場睇，驚自己膽汁嘔埋出來。談到打算喬裝入場睇觀眾反應，他笑言家中有「二撇雞」鬍鬚，若然見有個人「二撇雞」又哨牙就一定是他；阿佘笑言她若喬裝的話都會黐鬍鬚。（攝影：鄧國良）