【Shimba Column】 最強Emoji係邊個?

唔少人喺WhatsApp 發訊息時都會加入 Emoji 表情符號，因為一個簡單嘅表情符號，往往可以代替長篇大論嘅文字，表達當時嘅心情同感受，一按就可以回應，慳番唔少打字時間。其實WhatsApp都已經囊括咗好多唔同情節同心情嘅Emoji，好多都係Universal Language，同中外好友溝通都應該無咩問題，但最近WhatsApp喺印度，就因為一個Emoji面臨民事或刑事起訴，咁大鑊？咪因為「豎中指」 Emoji囉！印度法律列明向任何人使用猥褻、淫蕩或冒犯嘅手勢都屬違法，「豎中指」 Emoji就係直接教唆使用不法嘅手勢，有印度律師仲要求 WhatsApp移除「豎中指」Emoji添，真係笑咗！
再睇下，Apple佢地最近就公佈咗2017年最流行嘅emoji，你估吓係邊個？原來係英美法三國嘅統計中最受歡迎嘅Emoji竟然係哭笑不分嘅表情（Face With Tears of Joy），第二流行就係紅色心心（Red Heart）。點解係呢兩個表情符號就真係解釋唔到，不過今次Apple嘅Emoji 排行榜就引伸咗一個有趣嘅疑問：Apple點知使用者每日喺鍵盤上發送出去嘅資料呢？眾所周知Apple 一向宣稱注重保護用戶隱私，咁Message對話嘅數據係點收集出黎呢？
唔講唔知原來Apple而家係透過「差分隱私」（Differential Privacy）嘅方式，係收集資料嘅過程中，加入一啲隨機嘅干擾資訊，將使用者個人資料打亂，然後混合其他幾百萬人嘅資料，咁就只可以睇到整體資料而睇唔到個人資料，唔小心資料外洩都唔驚資料俾人用到。其實而家無論咩行業同產品都會通過收集資料了解使用者嘅喜好，藉此改進產品同提升使用者體驗，不過作為使用者就真係要了解清楚自己嘅個人資料去咗邊同點用，費時俾人用咗生財工具都唔知。