【Shimba Column】 最强Emoji系边个?

唔少人喺WhatsApp 发讯息时都会加入 Emoji 表情符号，因为一个简单嘅表情符号，往往可以代替长篇大论嘅文字，表达当时嘅心情同感受，一按就可以回应，悭番唔少打字时间。其实WhatsApp都已经囊括咗好多唔同情节同心情嘅Emoji，好多都系Universal Language，同中外好友沟通都应该无咩问题，但最近WhatsApp喺印度，就因为一个Emoji面临民事或刑事起诉，咁大镬？咪因为「竖中指」 Emoji罗！印度法律列明向任何人使用猥亵、淫荡或冒犯嘅手势都属违法，「竖中指」 Emoji就系直接教唆使用不法嘅手势，有印度律师仲要求 WhatsApp移除「竖中指」Emoji添，真系笑咗！
再睇下，Apple佢地最近就公布咗2017年最流行嘅emoji，你估吓系边个？原来系英美法三国嘅统计中最受欢迎嘅Emoji竟然系哭笑不分嘅表情（Face With Tears of Joy），第二流行就系红色心心（Red Heart）。点解系呢两个表情符号就真系解释唔到，不过今次Apple嘅Emoji 排行榜就引伸咗一个有趣嘅疑问：Apple点知使用者每日喺键盘上发送出去嘅资料呢？众所周知Apple 一向宣称注重保护用户隐私，咁Message对话嘅数据系点收集出黎呢？
唔讲唔知原来Apple而家系透过「差分隐私」（Differential Privacy）嘅方式，系收集资料嘅过程中，加入一啲随机嘅干扰资讯，将使用者个人资料打乱，然后混合其他几百万人嘅资料，咁就只可以睇到整体资料而睇唔到个人资料，唔小心资料外泄都唔惊资料俾人用到。其实而家无论咩行业同产品都会通过收集资料了解使用者嘅喜好，藉此改进产品同提升使用者体验，不过作为使用者就真系要了解清楚自己嘅个人资料去咗边同点用，费时俾人用咗生财工具都唔知。