佗男B？賴慰玲晒大肚寫真 懷孕初體驗有笑有淚

賴慰玲今年7月宣佈懷孕5個月，9月與舞台劇演員男友梁子峰結婚，臨盆在即的賴慰玲今日在社交平台分享性感大肚寫真，以全黑Look示人，展露型媽一面。她感言：「由兩條線到了今天，一步一步走來真不容易。第一次產檢聽到你的心跳聲，喊咗；第一次感受到你的胎動，喊咗；第一次向朋友介紹你的出現，喊咗；第一次見到你郁到我個肚3尖8角，笑咗。這8、9個月來相依為命的每一日，你都令我感覺到好溫暖（有時仲會好熱），女王式的生活快要結束，爸爸媽媽都好期待和你見面，和你一起健康、成長，咁到底你係幾時出嚟呢？」 賴慰玲一直保密BB性別，不過此Post一出，新婚好友陳嘉寶的留言似乎洩密了，戥賴慰玲開心的她寫了「乖契仔❤靚媽媽❤」。唔通賴慰玲第一胎係生男B？