私家車葵涌剷巴士站司機涉5罪被捕 乘客雞飛狗走：撞完後波仲撞多次

葵涌早上發生私家車剷上巴士站意外，司機受傷一度被困，候車乘客被嚇至雞飛狗走，幸無路人受傷。27歲姓洪司機涉嫌危險駕駛、使用未經登記車輛、在沒有第三者保險下駕駛汽車、駕駛時沒有攜帶駕駛執照及未能出示身份證明文件被捕。 事發於早上8時左右，私家車沿石排街上斜，期間報稱私家車失控，扭向石排街落斜一線行駛。私家車其後撞向沿石排街落斜二線行駛的輕型貨車，再撞向鐵欄。私家車及後倒車時，撞向一巴士站。幸無撞及正在候車的乘客。私家車受損，司機受輕傷被困車內，由救援人員救出後清醒送往瑪嘉烈醫院救治。 有網民表示當時在事發現場，坦言如果早點發生意外，會造成更大傷亡。網民Chris Lam在fb群組香港突發事故報料區指出：「佢本來上梗斜，突然過對面線，對面線有好多車落梗嚟，嚟梗果㗎貨車已經響晒安㗎喇！啲車畀佢嚇到停晒響度，佢衝過對面線不特止，仲要撞埋去巴士站。最驚險係，所有人以為件事完咗，原來佢仲要後波，繞咗個半圓形，再用車尾撞多次巴士站，嚇到排隊等巴士同埋啲途人急忙閃避。好在啲人走得切，唔係實有人比佢撞親。之後架車不停漏油，司機冇出到嚟！我帶住個女都趕住走喇！超觸目驚心！」 建立時間：0949 更新時間：1405