颱風有假放！Bob陸永帶囝囡兩家開Party

等放颱風假唔只係普通打工仔嘅願望，就連平日開廠開足N日嘅藝人都有呢個心願。最近日日係《老表畢業喇》見到阿BOB，不過再次成為爸爸嘅佢，忙到甩轆，噚日終於有時間陪老婆囝囡，仲去埋陸永屋企一齊玩，難怪連佢自己都慨嘆「唔係打風，我諗要約多半年先成事」！ 林盛斌（Bob）細仔林道申（Jaye）8月底出世，一家6口人才濟濟，Bob太太早前亦宣佈封肚，要享受家庭樂並唔容易，因為一家六口要照顧真係開支大。不過噚日颱風假，終於有得抖抖，仲同好友陸永全家一齊玩，之不過影相時，竟然陸永兩個女囡都唔望鏡頭到底咩事呢？阿BOB都留言話：「唔係打風，我諗要約多半年先成事，終於見到兩位陸小姐同特別嘉賓洪先生.... 點解淨係我三個女望鏡，陸生你屋企係咪有嘢？」'