湯寶如開25周年騷邀老友撐場 怕再出意外舞台棄用樓梯

湯寶如（湯記）舉行個唱記者會，宣佈11月15日於Star Hall開騷。湯記指入行25年結識到好多朋友，若真的把所有好友也請來做表演嘉賓，會變成群星雜錦騷，故只邀請了幾位很close的朋友，其中陳曉東和黎瑞恩（小恩子）走唔甩。問到不想舞台設置樓梯，是否因小恩子5年前在她的個唱落樓梯時不慎連仆數級留下陰影？湯記直認：「係呀！那條發生意外的片段，我只看了一次，但腦海中不停loop住，舞台上落樓梯真的很危險，擺放就OK ，但不要行，所以我會要求用升降台。」 為個唱積極Keep fit的湯記又指太忙無時間運動，先從飲食入手，她說：「先戒澱粉質，但搞到有躁狂症似的，不過都無法，忙到今個月夾夾埋埋連見個仔都無24小時。（兒子有否投訴？）有呀，唯有叫佢畀心機讀書，到時來睇演唱會，不過佢未必想睇，話要返學，佢嘅期先難mark。已經10歲仔，會自己話事無得逼，最緊要佢舒服。（會否陪兒子溫書？）唔會，我試過了，但本身躁底，爭啲除鞋兼攞藤條，唔想因為咁樣破壞母子感情，寧願放手畀人教；加上依家啲課題好深，有時還要查字典。」 提到只辦一場個唱是否夠喉？湯記坦言：「夠喇，已經要好用力，會唔會加場再看心情。其實原本我想舒服少少，下月初會出新歌，想萬事俱備下再辦個唱，場地是紅館；但公司認為今年是25周年紀念好應該開騷，再繼續入紙申請紅館期。其實對我而言數字係唔重要，相信周慧敏開完30周年演唱會，下次再開都唔會提幾多周年。如果再開，我想搵個男歌手合作crossover，有好男人唔該介紹下。」