令熊一家設局呃Rainman 網民估陳展鵬林子善成Final Boss

無線劇《同盟》上集講到鮑起靜飾演的令熊死咗，皆因阿仔陳展鵬趕唔切注射翻生解藥，更哭成淚人。今晚播出的一集中，阿媽令熊同兩位乖仔又團圓，一家人驚死觀眾唔明，為局中局解畫。陳展鵬講返要做場戲瞞過「金天」Rainman江美儀，強調為鮑姐打假死藥，其實藥效係維持兩個半鐘，計好數趕得切為鮑姐注射解藥。「子杰」陳展鵬同「千佑」陳山聰兩兄弟出面爭權，揮刀隻揪，都係早已串通做場大龍鳳，欺騙一直暗中監視的Rainman。 陳展鵬為咗埋江美儀身，二人有私下來往，搞到蒙在鼓裏的「清欣」胡定欣以為愛人陳展鵬有異樣，引起誤會。不過身有屎的Rainman發現被陳展鵬跟蹤時，雙方即發生槍戰，雖然定欣口裏對陳展鵬起疑心，但身體卻很誠實，突然在槍戰中出現兼為愛人擋子彈，搞到昏迷，Rainman則成功逃之夭夭。陳展鵬望住瞓病床的定欣一臉心痛又流晒眼淚，仲話：「之前冇對你坦白係我唔啱，你依家嘅身份唔係我嘅保鑣，係我高子杰最深愛、最信任嘅女人。」 另外，聽晚《同盟》大結局，Final Boss即將揭盅。之前不少網民估最忠心的「易先生」歐瑞偉會係Final Boss，又有人話「其實鮑姐係Final Boss，同金天夾計隊死晒其他人，想陳展鵬變第2個鮑姐，夠料繼承令氏」。不過睇完預告，網民又諗「家名」林子善有機會係終極大佬，「預告咁就踢爆林子善係Boss？」