傳甘比再懷孕 婚後第一胎開心「濕平」

37歲的香港女首富陳凱韻（甘比），與老公劉鑾雄（大劉）情比金堅，兩人經已育有一子一女，但有傳甘比近月再度懷孕，成為二人第三個愛情結晶品，不過這胎亦是甘比去年底「升呢」坐正成為劉太後，與大劉的「第一胎」，可喜可賀。 大劉與甘比拍拖多年，去年十一月更高調於多份報章刊登全版聲明，澄清自己已與女友呂麗君分手後，去年底與出身娛樂記者的甘比正式結婚。今年初，大劉將估計達逾百億、坐落尖沙咀彌敦道的大型商場「The ONE」贈送甘比，其後華人置業董事會再宣布，甘比獲委任為執行董事。 進行股份重組時，甘比所生的一對子女獲50.02%股權，並由甘比代持，甘比獲逾市值約113億港元的股份，成為華置最大股東，亦令她坐擁約540億身家，成香港女首富。 甘比傳出再度懷孕的消息，而且被拍到在銅鑼灣商場的名牌手袋店出沒，已見到甘比有懷孕身型「凸肚」出巡，而且身旁有保鑣護身。 現時，甘比要湊一對仔女，包括8歲秀樺和4歲仲學。甘比對子女一向親力親為，早前被拍到拖實囝囝仲學行上車，即使有記者，但劉太依然友善，微微笑同記者打招呼，全無黑面。至於萌爆乖仔都十分搶眼，皆因仲學穿上反斗車王卡通中，主角閃電麥坤的紅鞋仔，手拎淺藍色小飛象，精伶跟實母親。