81歲生日收大禮　謝賢驗收霆鋒億元豪宅

謝霆鋒在今年5月豪擲8千5百萬掃入淺水灣、面積約2千呎的複式向海豪宅，送給老竇謝賢（四哥）；連埋各項費用，霆鋒這份孝心真係億億聲。 在今個月81歲生日的四哥，就較啱時間去驗收這份大禮。日前，心情靚靚的他，親自上門收樓，在新屋內團團轉，又指手劃腳，對裝修設計滿有大計。事後，他即心急到灣仔選購浴室用品，樣樣親力親為，似乎想盡快入伙。

日前下午，四哥由司機從陽明山莊的寓所，接送到淺水灣新屋。從地產經紀手上接過一大抽鎖匙，正式收樓的四哥心情雀躍，隨即在單位內四圍參觀。新居屬複式兩層，實用面積合共2千呎，現場所見，他不時手指指，似乎對裝修設計都有晒計劃，跟著又測試燈掣、窗簾等，檢查得十分仔細。最後，他走出偌大的露台眺望遠景，對正的是一望無際的海景，景觀開揚怡人。 對於有新屋住，四哥滿心歡喜的說︰「間屋都幾大㗎，兩層，都好貴，要8千幾萬。」問到有否多謝阿仔霆鋒？他坦言：「唔通要我跪喺度多謝佢咩？梗係扮瀟灑啦！不過，我心裏面嗰句係『我冇生錯呢個仔』。」