為個唱吊威吔狂揈搞到嘔 李克勤歎冇得騷肌嘥晒

李克勤為9月開鑼的演唱會綵排，與18位舞蹈員快歌勁舞，更站在舞蹈員大髀上擺甫士；不過原來這些都是小兒科，還有高難度動作搞到克勤練到嘔。

克勤一輪勁舞後，笑指別看這場舞是一圍豐盛的晚宴，其實只是前菜，他笑謂：「今次唔知點解咁睇得起我，排舞老師安排我跳很多舞，是最多的一次。其實大家都知我跳舞天份相當有限，但今次真係前所未有咁勤力，好早已開始練，所以亦呼籲觀眾要準時入場，因為第一首歌就是《舊歡如夢》，可看看我的45度角un住的動作有無唔同。而且頭20分鐘已經要不停跳舞、吊威吔勁轉....全因我『牙斬斬』後生時周遊列國玩過山車、向公司提出又得到公司肯花錢租用場地，試用了威吔吊高狂揈了20、30個圈，結果狂嘔，完全感受內臟在翻騰，深深體會到被吊高不是開心事。」

雖然個唱在即，但克勤仍不停接商演搵錢，還剛自西安回港，他笑稱因囝囝開學要賺書簿費，細路仲細無辦法。提到服裝，克勤再笑道：「雖然我操練到七七八八，對波都大大哋，但設計師黃偉文講明唔要我露、唔會無衫著，我知佢今次到日本幫我搵衫，一定精彩。我都唔可以亂來，除唔除衫要經過兩位設計師太太和黃偉文的『家長指引』。」搞笑是其後拍照時，他貪玩夾波展成果，又的確有點睇頭，連他都忍不住笑指無得騷胸嘥晒！