倒數1個月生B　孫慧雪晒巨肚望快脆「卸貨」

孫慧雪去年底與羅天彥（Edwin）結婚後，今年2月宣佈佗B，預產期為8月中。BB仲有1個月出世，阿雪個肚相當巨型，佢都透露過醫生預計BB有10磅重，準備開刀生巨B。

今日阿雪再晒巨肚，自言心急生B，佗B時手腳麻痹。阿雪留言：「幾時先可以卸貨呢？同我同期宣佈有咗BB嘅朋友都好似卸晒貨啦❤最近開始持續好急好急嘅感覺！瞓醒覺時手腳都好麻痹，醫生話BB好巨型，可能要開刀‍。但醫生放假了，所以搵咗另一位醫生幫我持續再觀察下先！我問姑娘，如果突然陣痛生得呢？姑娘話到時會有辦法，希望唔好食全餐」。網民都驚覺阿雪個肚好巨型，並留言鼓勵「好勁呀！母親真偉大」、「加油雪雪，一定順順利利」、「期待你個巨B出世 」。