唱K晒恩愛　楊明情不自禁咀莊思明

楊明月前拍攝劇集《抱佣情人》時，就被發現同有樣有身材、演開妹仔角色嘅郭千瑜態度親暱，繼而傳出楊明暗溝對方。當時女友莊思明就話，絕對信任男友肯定冇越軌舉動同思想。有指楊明o依家無論去邊都會同女友報告行蹤，令佢開心又放心。

其實，呢對小情侶拍咗拖一年幾，感情已經相當穩定，兩個仲不時喺社交平台放閃，更加係行到邊咀到邊嗰隻，真係煙韌到暈！日前，楊明拍完新劇，於是同女友飛去馬來西亞度假，唔好以為佢哋揀去亞熱帶地區，就一定係去海灘同陽光玩遊戲。對於鍾意夜夜笙歌嘅楊明嚟講，晚黑去唱下K、飲下酒，先至啱佢口味。 現場所見，莊思明單獨唱歌時，楊明就會猜枚自娛；當鏡頭一轉，佢兩個合唱嗰陣，首歌一有停頓位，楊明就要咀嘴，肉麻到身邊朋友冇眼睇！