小齊51歲生日收成吋厚利是　捐鮮浪潮答謝杜琪峯獨具慧眼

任賢齊（小齊）今日（23日）51歲快樂生辰，昨晚老闆林建岳同杜琪峯（杜Sir）、古天樂等為他舉行生日飯局，一齊唱生日歌、切蛋糕和食壽包，非常開心。小齊果然是好男人，經理人送他大利是，他全數捐給「鮮浪潮」以行動支持香港電影創作人才。席上眾人見到成吋厚的利是都嘩然，小齊不肯誘露金額，但強調全是港幣。小齊生日願望身體健康，連日來收到好朋友們的祝福和禮物，他高呼：「我好幸福啊！」

「鮮浪潮」發起人兼主席杜Sir，就送小齊一支限量版「杜琪峯酒」做生日禮物，還在印有他肖像的酒盒上簽名留念。小齊好開心，說：「因為我好少飲酒，而且呢支酒咁有紀念價值，我會好好珍藏，好快就成為全球唯一一支，更加珍貴！」小齊表示非常敬佩杜sir，說：「我一直都係演好男人、正派角色，十幾年前杜Sir叫我喺《大事件》演大賊喎，當時我話我唔識演，但佢話：『嚟到現場就演到㗎啦！』結果去到片場有杜Sir指導，我真係演到，大家都對我另眼相看。幾年後杜Sir再搵我喺《樹大招風》演悍匪，不但有機會提名影帝，之後仲有好多好多劇本搵我演反派、大賊，證明大家都認同我嘅演技，好開心，真係要多謝杜Sir獨具慧眼！」