黎明憂7.1開騷落雨　明福俠高唱：太陽叔叔錫我哋

黎明（Leon）將於7月1日與陳小春、張智霖在中環海濱活動空間開騷，雖然相距仍有整整一個星期，但香港落足十幾日雨沒停過，Leon似乎都好擔心天雨影響戶外騷，今日再以「明福俠」現身臉書，留言：「太陽叔叔，我哋錫晒你」，在短片中就唱：「祈求7月1號太陽叔叔非常錫…我哋，太陽叔叔錫我哋，就會陽光普照，我哋錫晒你。」

有網民話即刻去睇天文台官網，「7.1部份時間有陽光，有幾陣驟雨，希望得到你呢位太陽之子嘅祈福，到時一滴雨都冇，陽光普照，夜晚冇雲，睇煙花就會清啲靚啲，見到你時人都會high啲」。