洪永城自爆赴北韓帶禁書　簽悔過書險遭拘留

在北韓被囚禁超過15個月、上星期獲釋回國的22歲美國大學生瓦姆比爾逝世。曾經在北韓拍攝旅遊節目《在那遙遠的地方》的主持人洪永城，在Facebook發文憶述在北韓工作期間，因攜帶關於最高領導人金正恩的禁書入境，幾乎遭到拘留，直呼非常幸運。 洪永城ＦＢ原文如下： 見到美國大學生俾北韓控告偷取政治標語，回美國後病逝嘅新聞，聽講佢係喺羊角島酒店偷咗一張金正恩肖像嘅海報，被判勞改15年，諗返起，覺得自己非常幸運。 兩年前去北韓，當時我由中國丹東進入北韓平壤海關嘅時候，我犯咗個低級嘅錯誤，我帶咗本喺香港買嘅北韓書，我唔記得擺低喺中國，老實講，有關於北韓嘅書都冇乜邊本係講好嘢㗎喇，最弊就係封面套咁啱係將金生嘅肖像接咗一半，佢一搵到嗰一刻，我成身喺度震，當地官員睇到即刻拉我入去一間房，問我本書講咩喎？我梗係話唔知啦，睇都未睇過....但唔知邊度躡出嚟一位識普通話嘅女士，揭開本書喺度讀喎，好彩本書唔係我寫，之後佢淨係要我簽一份悔過書，要我承認本書唔係我寫、唔贊成書入邊寫嘅嘢、無意威脅金正恩嘅政權等等.....之後就俾我走，最後講咗句 "no worry, enjoy your journey"。 如果你哋下次去北韓，千祈千祈唔好帶北韓嘅任何資料同埋唔該你哋delete晒電話入邊金正恩嘅圖片，祝大家好運。