撐起成頭家被前夫話霸道　肥媽認欠缺溝通負離婚責任

常言道「清官難審家庭事」，無線節目《關你家事》將普通市民、藝人的情史、家事擺上枱做噱頭。節目預告早已講過肥媽（瑪利亞）淚如雨下哭訴曾遭家暴，昨晚播出的一集未見肥媽爆喊，不過佢提到第一段婚姻時，自爆面對婚姻都有做錯。 肥媽於18歲時嫁畀大22年的酒吧鋼琴師，婚後1年老公突然失業，為了養活1家8口，包括老公與前妻的4個子女。她同時做多份兼職，薪金上繳老公，未到月尾已經使晒。肥媽可謂身兼父職，自認當時睇唔起老公，更發現老公有暴力傾向，「佢打細路，我走去護住，連我都打埋。仔女一定要我離婚，要我揀，話『你一係揀阿爸，一係揀我哋，因為跟住佢冇前途』，後來我揀咗仔女。」離婚時，肥媽的前夫在律師面前說她是「好霸道的老婆」，肥媽亦坦言兩公婆欠缺溝通，容易產生誤會，自認有責任。

與前夫育有一子的林雅詩亦是節目嘉賓，她提及家暴時，表示婚後聽老公話（即前夫）要相夫教子，沒有出外工作，又冇朋友。不過前夫將工作上的負面情緒帶返屋企，向兩母子發洩，搣到阿仔瘀、突然搖阿仔個身。林雅詩自言：「唔開心會去廁所喊，忍下算，最後阿仔主動叫我離婚。」