洪永城自爆赴北韩带禁书　签悔过书险遭拘留

在北韩被囚禁超过15个月、上星期获释回国的22岁美国大学生瓦姆比尔逝世。曾经在北韩拍摄旅游节目《在那遥远的地方》的主持人洪永城，在Facebook发文忆述在北韩工作期间，因携带关于最高领导人金正恩的禁书入境，几乎遭到拘留，直呼非常幸运。 洪永城ＦＢ原文如下： 见到美国大学生俾北韩控告偷取政治标语，回美国后病逝嘅新闻，听讲佢系喺羊角岛酒店偷咗一张金正恩肖像嘅海报，被判劳改15年，谂返起，觉得自己非常幸运。 两年前去北韩，当时我由中国丹东进入北韩平壤海关嘅时候，我犯咗个低级嘅错误，我带咗本喺香港买嘅北韩书，我唔记得摆低喺中国，老实讲，有关于北韩嘅书都冇乜边本系讲好嘢㗎喇，最弊就系封面套咁啱系将金生嘅肖像接咗一半，佢一搵到嗰一刻，我成身喺度震，当地官员睇到即刻拉我入去一间房，问我本书讲咩喎？我梗系话唔知啦，睇都未睇过....但唔知边度蹑出嚟一位识普通话嘅女士，揭开本书喺度读喎，好彩本书唔系我写，之后佢净系要我签一份悔过书，要我承认本书唔系我写、唔赞成书入边写嘅嘢、无意威胁金正恩嘅政权等等.....之后就俾我走，最后讲咗句 "no worry, enjoy your journey"。 如果你哋下次去北韩，千祈千祈唔好带北韩嘅任何资料同埋唔该你哋delete晒电话入边金正恩嘅图片，祝大家好运。