《詭探》異軍突起　邵仲衡拍到熱衷「茅山術」

以香港的「都市傳說」作為藍本的ViuTV劇集《詭探》，題材新穎，異軍突起，甚至被網民投訴「唔夠喉」。主角邵仲衡坦言對反應熱烈感到意外，他認為此劇有自己的特質，不能用傳統框框衡量，當初接拍便是被題材吸引，更拍到對「茅山術」產生濃烈興趣。 《詭探》播出後大受歡迎，邵仲衡坦言對此感到意外，他透露最初接這劇是因為被題材吸引：「我係鍾意佢講一啲好地道、我地由細到大（聽）嘅一些鬼故，但佢陣味好有深水埗、鴨寮街...嗰陣味，濕濕地又發霉，啲人個個都怪怪地、甩皮甩骨、岩岩巉巉嘅角色，我鍾意咁樣。」 不過，有不少網民投訴只播30分鐘「到喉唔到肺」，問到假如自己是觀眾會否同樣覺得太短？邵仲衡直言：「我唔會用呢個方式去諗，因為比較唔到。」他表示此劇有自己的特質，「我哋成日都講話以往的製作嘅單位，或者視像上睇得到嘅都係啲舊式嘅方式，但點解我地仲要用舊嘅方式，嗰種嘅框架，或者嗰種嘅概念去衡量新嘅製作呢！」 邵仲衡又認為製作團隊這決定不單只照顧傳統依時間看的觀眾，亦在照顧以不同電子器材收看的觀眾，「有人係網上睇，即係所謂有人用電話睇，或者搭緊車嘅時候睇，或者去緊廁所嘅時候睇，咁佢唔覺得呢半個鐘頭嘅嘢係短。但的而且確我又係度幻想，我係屋企用電視預載App睇，我又的而且確覺得短喎，但我係度諗返我走去用我電話嘅話，玩下手20鐘攞住，好快過。」

劇集題材新穎，當中泛及中國古老道術「茅山術」，邵仲衡透露期間師父或徒弟都會在場支援，而且他亦對「茅山術」這種奇怪又令人嚮往的古老學術，相當感興趣，「好似《Harry Potter（哈利波特）》咁，佢自己創作咗啲嘢出嚟，行落去個月台嗰度搭火車，九又二分一（九又四分三）嗰個月台，唔係九唔係十。Boom一聲要夠膽撞埋去牆度，你驚道牆撼到你咪入唔到去囉。即係一啲make believe（令人相信）嘅嘢，但佢一定有佢嘅存在價值係度，如果唔係人地唔會覺得係有存在保留嘅價值。」 拍攝此類型的劇集，都會好奇期間會否有靈異事件發生，邵仲衡表示：「好順利，現場可能有啲人嚟做嘢、嚟騷擾，好快搭下膊頭咁乒呤唪冷就走咗去，無聲無息好似好易解決。可能去到落緊雨嘅，擔心拍唔拍到嘅，去到準備拍就自動停雨，好順利！」聽到其他演員說拍到靈異照片之類，他笑指：「始終係老掉牙的說話『信者有不信者無』。」