評港鐵縱火案惹抽水疑雲　坤哥：曲線諷刺拍片的人

歌手吳業坤出席東華三院146周年慈善晚宴，日前港鐵發生縱火案，傷亡慘重，然而坤哥竟在其個人facebook留言「火燭當然是要拍片放上網緊要過逃生啦！」閃現一會便已刪除，他事後解釋此舉是曲線諷刺只顧拍片的人，無意抽水。 坤哥回應留言抽水事件時稱：「曲線啫，作為一個不只是藝人，而是作為市民，今(前)日見到新聞指有位洋人掛住拍片吸入濃煙要急救，其實我想說如果有咩緊要事發生，都要依逃生指示離開，不要阻礙救援，不過太曲線又怕人誤會，所以刪除咗，在個人頁面打番正常嘢，發表吓個人意見。(想諷刺人？)諗諗下都係唔好，剷咗佢好啲，近期好易中招。」問他有否中招被網民鬧？ 坤哥稱：「冇人話我，咁我都祝願受傷嘅朋友早日康復，冇人想件事發生。(怕唔怕畀人話你抽水？)唔覺得係抽水，大家個價值觀係咪扭曲咗，分享趣事係ok，但危險嘅事唔應該為呃like咁做，雖然我成日呃like，但係無傷大雅，唔會整人，唔係幸災樂禍。(咁你之後寫咗咩？）話點解發生咗事，啲人仲掛住拍片，希望唔好再有同類型事件發生。」坤哥坦言以後留言會小心點，想清楚再寫，因大家很敏感，會抽秤一兩個字眼，而他亦已經「十幾」事長一智，問是不是「食好西」那次？坤哥說：「嗰句無傷大雅，平時朋友間討論ok，但如果公眾，有太多人有唔多睇法，我會收番少少，不過都多謝大家關注我。」