石天欣無端涉詐騙　疑身份證遭盜用

早已離開TVB的石天欣，去年7月與圈外男友Jacob結婚，嫁過美國做在職師奶，搞吓網購生意做埋Youtuber拍生活日常。近日身在美國的石天欣自爆，住在香港的媽咪收到CID電話，致電的「羅sir」竟然話石天欣牽涉一宗詐騙案，仲叫石天欣去旺角警局搵羅sir。電話騙案咁多，呢件事就搞到石天欣頭都大埋，質疑「真定假？」 石天欣煩上加煩，因為石媽媽又接到另一名「蘇警長」電話，仲上埋門搵石天欣，但屋企又冇人，於是又叫石媽媽去警署協助調查。知道媽媽如此頻撲，人在美國的石天欣忍唔住爆Seed，唔想煩到媽咪之餘，亦覺得警察處理手法有問題，「我受夠，到底想點呀？ 有無人可以話我知到底人喺境外，又想知自己有咩案件可以點？講啲又唔講啲咁，其實可唔可以check下出入境先？ 可唔可以上網做下research先？朱經緯啲案，好多案都唔查，反而唔辛苦去到我屋企門口，因為我叫自己香港人？ 我係咪要坐洗頭艇？我洗唔洗搵個律師同我媽咪去？我受夠！到底邊個想玩我？玩就嚟同我玩，唔好玩著我呀媽。」 原來石天欣被查一事屬實，有指石媽媽已到警署了解事件，懷疑石天欣的身份證被盜用，石天欣仍然處理事件中。