飲維他奶前並冇水晶球｜曾智華
2024-11-13 17:08 
上星期本欄內容，乃小弟觀察近期維他奶國際（345）變化後，隨意一篇分析《楊協成鯨飲維他奶》，絕無甚麼目的，稿一篇矣。豈料，剛剛遇上啱啱，維他奶股價，突然起風雲！
小弟電話響個不停，人人問：（一）碌sir，你點知佢會升㗎？（二）現今價位，應否追入？我的答案：（一）唔該睇返上周專欄；（二）唔該自己做吓功課，再作分析，決定買唔買！投資任何股票，若似盲俠擲飛鏢，中至奇，咁懶唔用腦，抵你蝕大本。
講返維他奶，戲劇性一幕，在上周四上演，股價突於中午嘭嘭聲由最低9.35元火箭般突然升上10.76元，乃年度新高。喂，究竟邊個傻佬咁重手如此亂掃？當然不會企得住，於是瞬間回落，幸而收市力保9.8元高位。但成交勁誇張，去到2,600萬股！
巨富買股多非投機
維他奶去向將如何，我冇水晶球，唔知，只知今次維他奶的變化，絕非一啲傻仔亂噏：「可能黃廷方家族在炒炒貢呢！」
巨富買股，例如香港首富李嘉誠，絕不會似小炒家般投機心態炒出炒入。要出手，無論是幾十年前買和記黃埔或近年收購英國大型電訊公司及電力公司，皆先做足非常詳盡審查與研究，再肯定其前景非常秀麗後，才會耐心等待一個低價買入，確保立於不敗之地。
富豪皆好勝之人，錢大把，但仍要求鋪鋪眼光精準贏同行。
今次黃廷方家族睇中維他奶，終等到佢跌至弱雞價再見管理層明顯無心戀戰才出手，正是要一擊即中，長期據為己有！
資深傳媒人 曾智華
相關文章：
關鍵字
最新回應