今季投資馬（二）｜曾智華

馬迷皆知，練馬師中，蔡約翰最多又新又勁的馬，旗下肯使錢的馬主也在眾馬房中數一數二，例如「榮太子」榮智健，凡入的皆高價貨，上陣次次博，唔得即換。上季又入咗隻3歲新星，正是我要介紹的第四匹投資馬「神馳」！

「神馳」配布文 兩場必有W

「神馳」父系Starspanglebanner，在港同父馬有「加州星球」及「永遠美麗」，兩隻皆在頂班掃下多W，「神馳」肯定唔例外。上季尾初亮相跑3場，即交出一Q一P，並全有獎金，步頭相當洶湧，鬥心強橫。新季上陣，只要是布文執韁，兩場之內必有W！因此乃蔡廐大賽棋子。

「以戰常勝」有機會成馬王

第5匹介紹「以戰常勝」，單睇評磅員出手，已知此駒有機會成馬王級。上季5月中亮相，52分起步，一出即殺下兩W，第3場又入Q，3場勁加18分！其實，兩場W布文都冇跑盡，輕贏不足1個馬位；第3場明顯「就住就住」入Q就收手。此馬能力在不斷上升中，新季應有三W在手！

講講另一馬房沈廐，沈集成的鬥志眾所周知，能訓練出世界級馬王「浪漫勇士」，當然功力非比尋常。究竟邊隻是接力馬？

「包裝猛將」獲潘頓相中

介紹第6匹「包裝猛將」，父系Toronado，在港的出色後代不少，沈廐鎮倉之寶「維港智能」是其中之一。此馬初來港即被冠軍騎師潘頓相中，當然霸住，第一場已交出功課，輕輕鬆鬆贏個多馬位，評磅員當然唔客氣，一加就8分。呢匹馬必成明星，亦會次次去，投資最佳對象也。

「大哥兒」氣量必不簡單

第7匹介紹從未在港出賽，屬大馬主蕭劍平旗下的「大哥兒」。蕭氏家族買馬及相馬有極佳紀錄，多次勝出級制賽。「大哥兒」屬英愛馬，兩歲時跑過一次膠地1600米，13匹馬作賽，輕輕鬆鬆W出後即運港，如今3歲。能2歲贏1600米的馬，氣量及質素必不簡單，我會先投資3場再作決定。

「浪漫戰神」肯定目標打吡

第8匹也是沈廐馬「浪漫戰神」，肯定以打吡為目標，海外曾於2000米跑出W，3歲仔有此氣量必須重視。此馬曾出賽5次，兩W一Q兩P，屬唔識又唔肯輸類別。沈集成將訓練到唔好唔出，相當肯定會一路殺上精英班跑級制賽！

資深傳媒人 曾智華

相關文章：

今季3匹「投資馬」｜曾智華