35歲Alton獲嘉盈狂讚冇老油條味好興奮 首合作舞台劇演嫖客鳳姐互相欣賞丨獨家
2024-09-25 07:00 
35歲MIRROR成員Alton（王智德）跟26歲嘉盈，首合作舞台劇《一樓一會》，劇中兩人是嫖客「魏生」和鳳姐「小雲」，角色關係難免有身體接觸。Alton坦言冇偶包，為首部孭飛劇豁出去，更自爆同「魏生」的愛情觀一樣，就算幾鍾意都唔會多手多腳，「一見就流晒口水就唔得！」兩人因合作變熟絡，嘉盈唔怕「蛋白粉」（Alton Fans暱稱）呷醋，狂讚對方，優點數極唔完，男方又反讚女方講嘢有意思，係好好嘅同伴，溫暖得嚟帶啲甜味喎！採訪：杜杜 攝影：朱偉彥
首演嫖客的Alton坦言「偶包人哋畀，自己唔攬咁多上身。」成日Po素顏相的嘉盈笑言都想自己有偶包。Alton又自爆反而公司有顧慮，「公司用一個關心嘅角度，擔唔擔心角色設定係嫖客？！我明佢哋關心啲咩，自己一聽到消息再思考，都冇乜抗拒，戲劇世界就係包含晒所有可能性，冇乜太大考量。」
自創包晒全身露3點
兩位舞台劇初哥不用試鏡便獲得角色，特別珍惜機會，嘉盈表示跟團隊互相信任，合作更加安心。Alton亦認同，「冇casting但選擇咗你，一齊承擔風險。」講到跟「魏生」的共通點，Alton認為是面對心儀女生的態度，「會識啲禮節，鍾意但唔會做過份嘢，我個愛情觀都係咁，鍾意還鍾意，都唔可以太失禮，一見就流晒口水就唔得。」嘉盈覺得跟「小雲」最似是目標為本，「中間受咗委屈，完成目標就會唔記得。」至於演鳳姐，造型會否好性感？嘉盈答得搞笑：「我極力同監製講，如果角色需要咩衣着冇乜所謂，唔係要露3點，我驚佢哋太錫住我，唔會整件包晒全身但露3點嘅衫畀我！」Alton狂笑，「我諗緊點包晒全身露3點？！好高端喎！」兩人笑指這個設計可提供給服裝組。
被讚有少年感超開心
嘉盈對Alton的第1印象是身形，「大隻，唔好意思，好膚淺呀！但佢咁啱拍緊劇，真人瘦啲，以前畀我感覺有少少delayed，同埋『宅』自己世界，毒毒哋。」Alton笑着回應，「唔緊要，第1印象冇乜所謂，你係咪見到我同牆講嘢？！」嘉盈即答：「嗰次我當你打電話，仲有佢唔老油條，有啲人『碌』太多年，有老油條感覺，佢仲有少年感。」Alton好滿意答案，「合理嘅，講得好，我鍾意少年感。」嘉盈再補充，「我開口講嘢老積過同年紀女仔，冇咗青春感覺，識咗佢發現有少年感，好羡慕。」女方再讚男方識人情世故，好挑通眼眉，亦好gentleman。Alton不斷被讚美滋養笑得好開心。而他對嘉盈的第1印象就冇太大分別，「佢係網上知名紅人，我都有睇過佢嘅片，1個月後都係嗰個嘉盈，外向，好冇所謂，好冇距離感，好好嘅同伴，唔好睇佢講嘢嘻嘻哈哈，認真上嚟都講好多含金量嘅說話。」
嘉盈放得開減少壓力
劇中兩人是肉體交易關係，嘉盈表示身體接觸在所難免，但程度屬老少咸宜，「我嘅演藝初吻都仲喺度，唔知會唔會改劇本，但演員有時唔係跟劇本做，會有自己發揮。」Alton就趁機谷票房，叫大家買飛入場就會搵到答案，不過他坦認嘉盈放得開，作為男對手，壓力都減少，「我哋上workshop玩遊戲，手上揸住個樂器，要打到對方個樂器，我承認第1次同佢玩驚整親佢，但佢叫我當佢係男仔，大家熟絡喺舞台上先可以將火花發揮得最好。」不過對於「一樓一」有否真愛存在？兩人想法就完全相反，Alton說：「我相信，本身愛就係冇呢種界限。」自稱理性的嘉盈就不信，「愛情嘅三角理論係親密、激情、承諾，親密同激情可能喺『一樓一』搵到，但承諾比較難，女仔個職業係咪咁易犧牲？！男仔又係咪可以包容到所有呢？！」問到Alton會否像「魏生」一樣為真愛冥婚？他先「say no。」但若然遇到生命中的「小雲」就動搖，「我遲啲先答你！哈哈！」嘉盈繼續持相反意見，「為咗個男人冥婚睬你都傻，阿彌陀佛，我唔制，好驚呀！」
最新回應