35岁Alton获嘉盈狂赞冇老油条味好兴奋 首合作舞台剧演嫖客凤姐互相欣赏丨独家
2024-09-25 07:00 
35岁MIRROR成员Alton（王智德）跟26岁嘉盈，首合作舞台剧《一楼一会》，剧中两人是嫖客「魏生」和凤姐「小云」，角色关系难免有身体接触。Alton坦言冇偶包，为首部孭飞剧豁出去，更自爆同「魏生」的爱情观一样，就算几锺意都唔会多手多脚，「一见就流晒口水就唔得！」两人因合作变熟络，嘉盈唔怕「蛋白粉」（Alton Fans昵称）呷醋，狂赞对方，优点数极唔完，男方又反赞女方讲嘢有意思，系好好嘅同伴，温暖得嚟带啲甜味喎！采访：杜杜 摄影：朱伟彦
首演嫖客的Alton坦言「偶包人哋畀，自己唔揽咁多上身。」成日Po素颜相的嘉盈笑言都想自己有偶包。Alton又自爆反而公司有顾虑，「公司用一个关心嘅角度，担唔担心角色设定系嫖客？！我明佢哋关心啲咩，自己一听到消息再思考，都冇乜抗拒，戏剧世界就系包含晒所有可能性，冇乜太大考量。」
自创包晒全身露3点
两位舞台剧初哥不用试镜便获得角色，特别珍惜机会，嘉盈表示跟团队互相信任，合作更加安心。Alton亦认同，「冇casting但选择咗你，一齐承担风险。」讲到跟「魏生」的共通点，Alton认为是面对心仪女生的态度，「会识啲礼节，锺意但唔会做过份嘢，我个爱情观都系咁，锺意还锺意，都唔可以太失礼，一见就流晒口水就唔得。」嘉盈觉得跟「小云」最似是目标为本，「中间受咗委屈，完成目标就会唔记得。」至于演凤姐，造型会否好性感？嘉盈答得搞笑：「我极力同监制讲，如果角色需要咩衣着冇乜所谓，唔系要露3点，我惊佢哋太锡住我，唔会整件包晒全身但露3点嘅衫畀我！」Alton狂笑，「我谂紧点包晒全身露3点？！好高端喎！」两人笑指这个设计可提供给服装组。
被赞有少年感超开心
嘉盈对Alton的第1印象是身形，「大只，唔好意思，好肤浅呀！但佢咁啱拍紧剧，真人瘦啲，以前畀我感觉有少少delayed，同埋『宅』自己世界，毒毒哋。」Alton笑着回应，「唔紧要，第1印象冇乜所谓，你系咪见到我同墙讲嘢？！」嘉盈即答：「嗰次我当你打电话，仲有佢唔老油条，有啲人『碌』太多年，有老油条感觉，佢仲有少年感。」Alton好满意答案，「合理嘅，讲得好，我锺意少年感。」嘉盈再补充，「我开口讲嘢老积过同年纪女仔，冇咗青春感觉，识咗佢发现有少年感，好羡慕。」女方再赞男方识人情世故，好挑通眼眉，亦好gentleman。Alton不断被赞美滋养笑得好开心。而他对嘉盈的第1印象就冇太大分别，「佢系网上知名红人，我都有睇过佢嘅片，1个月后都系嗰个嘉盈，外向，好冇所谓，好冇距离感，好好嘅同伴，唔好睇佢讲嘢嘻嘻哈哈，认真上嚟都讲好多含金量嘅说话。」
嘉盈放得开减少压力
剧中两人是肉体交易关系，嘉盈表示身体接触在所难免，但程度属老少咸宜，「我嘅演艺初吻都仲喺度，唔知会唔会改剧本，但演员有时唔系跟剧本做，会有自己发挥。」Alton就趁机谷票房，叫大家买飞入场就会搵到答案，不过他坦认嘉盈放得开，作为男对手，压力都减少，「我哋上workshop玩游戏，手上揸住个乐器，要打到对方个乐器，我承认第1次同佢玩惊整亲佢，但佢叫我当佢系男仔，大家熟络喺舞台上先可以将火花发挥得最好。」不过对于「一楼一」有否真爱存在？两人想法就完全相反，Alton说：「我相信，本身爱就系冇呢种界限。」自称理性的嘉盈就不信，「爱情嘅三角理论系亲密、激情、承诺，亲密同激情可能喺『一楼一』搵到，但承诺比较难，女仔个职业系咪咁易牺牲？！男仔又系咪可以包容到所有呢？！」问到Alton会否像「魏生」一样为真爱冥婚？他先「say no。」但若然遇到生命中的「小云」就动摇，「我迟啲先答你！哈哈！」嘉盈继续持相反意见，「为咗个男人冥婚睬你都傻，阿弥陀佛，我唔制，好惊呀！」
最新回应