閒錢唔好郁，等……｜曾智華

今日標題，是否有點懸疑？點解唔好郁，究竟等乜呢？首先講唔好郁。香港一般打工仔，無論幾辛苦搵錢、儲錢及蝕幾多錢，受盡教訓也好，總之就是念念不忘想「投資」。

昨晚又係有老同學「奔七」，在座全部70過外，竟仍然猛問：「碌Sir，近來有乜好買呀？」真係服晒，班大哥全部入人生暮年，還會有幾多日子呀，仲想在「鱷魚潭」執錢？有冇咁天真？

「棺材本」穩陣至上

小弟不停強調，如今擁有的錢，絕對不能再「投資」（即炒乜炒物），因我哋完全唔輸得，揸住的乃「棺材本」，必須穩穩陣陣。

香港今天整體係點，唔使經濟學教授都知——「大大隻鑊」。樓市正在溶化中，你睇吓行政會議議員林健鋒心急到喊就應領略。另外，負資產數目隨着樓市不斷下跌而不斷上升，銀行當然嚇窒兼縮放貸，因唔知樓市會跌成點。惟有狠下心，不但拒絕借錢，相反頻頻call loan（銀行要求提早還款），呢招正似蠟燭兩頭燒，未知何時會喘定。

外圍情況也差到痹，大家一定記得N年前董建華日日唸住——中國好香港好，香港好中國好。如今香港唔多好，中國更……

總之西方世界以美國帶頭，瓣瓣都針對住中國而來，經濟手段更頻頻落重藥，包括明令外資撤退。冇乜啱唔啱，純「國家利益」，如果美國決定全方位砌中國，當然狠招全用。

其實以中央領導層的高度智慧，這個情況理應預咗，只能兵來將擋、水來土淹硬食，一方面谷內需，一方面加速發展新科技，開拓西方世界以外的市場。

瞓身認購政府銀債

香港人可以做乜？最重要維持一切人與錢自由出入。尤其後者，如今世界兵凶戰危，不少資金要搵安全港。新加坡一定食唔晒，香港只要話畀全球富豪知，錢放呢處，安全又自由，咁就有生存空間與角色。至於小市民，咪亂投資嘞，尤其是長者記住將財富鎖死在最安全地方，切忌手多多亂買賣。

我的策略是供滿自住單位行雷都唔賣，餘錢大部分鎖在政府年金自製終身長糧。然後就是今日標題的「等」嘞。等乜？等年年政府發行銀債，鋪鋪瞓身去盡認購！

資深傳媒人 曾智華