此時不斬租更待何時｜曾智華

兩年半前筆者屋企附近有個年輕創業者阿S，一個人租了一間小舖經營食店，日日夜夜勤勤懇懇地捱。基於出品質素唔錯，價錢合理，慢慢做出口碑，累積了不少熟客，我正是其中之一。

每日黃昏經過，皆見櫥窗掛出的食物賣得八八九九，暗暗替佢高興。因這個年頭的年輕人，有這種踏實默默苦幹精神的並不多。街坊支持阿S，顯示民心所向。

業主想加租「大返轉頭」

上周筆者又去幫襯，S仔皺晒眉頭話：「碌Sir想問你意見，間舖3年約已經過咗兩年半，剛剛業主來電，話好多客想租，若果想續約就要加租3成，否則就會收返間舖……」

S仔做食物店叻，但同業主「玩梭哈」，肯定未夠班。家陣條街啲舖頭執吓一間執吓又一間，附近大把空舖，呢個時候獅子開大口加3成？會唔會離譜咗啲？既然問到我，我就直接提議：「話畀業主聽加3成冇得做，唔租喇，執咗佢算喇。」

S仔照我指示「大」業主，果然中正要害，翌日業主WhatsApp就話：「咁啦，租生不如租熟，我都唔想換新客，唔知佢乜人，不如加1成半啦。」

擺明腳軟！S仔又問點對應？我答：「話佢知市況咁差，人人執笠，我都覺前景黯淡難捱，不如去打工。若果你減1成租，我就考慮吓續唔續約啦。否則你可以放盤嘞，我做埋呢半年就執笠喇。」 結果業主使出「泥鰍功」，死典爛典，但求加少少就收手。

不過，個人兩年多觀察，S仔的專業拼搏精神加上出品質素，絕對可再上一層樓，故此應該在能力範圍之下擴充。如今一街都吉舖，絕對是「租客市場」，只要夠膽還價，可能一斬就斬一半租金，正所謂此時不斬更待何時？

有實力可趁機更上一層樓

我咁講：「S仔，睇形勢你可企硬要求減租，若然業主肯減，就再花三兩年時間培養更多熟客，反正年輕，時間在你一邊。假若業主拒絕，我覺得都係一個良好契機試試自己擴張實力，就在附近搵間大啲嘅舖，放心熟客一定不會流失。」

做生意幾時進、幾時退，非常講客觀形勢。只要生意有根基，客路足夠，趁業主冇「牙力」，絕對是更上一層樓的好時機！

資深傳媒人 曾智華