交棒變交「火棒」｜曾智華

童年時經常聽長輩呻：「唉，真係生不逢時咯，否則點會慘成咁吖！」

最近小弟睇見恒隆系業績，尤其是恒隆地產（101）純利跌到一仆一碌，不期然個心彈出一句：「唉，今次陳啟宗真係『交』不逢時嘞，搞到阿仔一上場即出閘墮馬，有排修正，點跑落去呀？」

陳啟宗退休成逃生門

猶記得今年1月，陳啟宗開記者招待會，歡天喜地（貌似）宣布放下老父陳曾熙交託的重擔，捱足33年後，決定交棒畀現年41歲的陳文博，並於4月股東會後退出所有恒隆董事會職務。不過在笑騎騎的面容之下，佢拋下兩句：「今日營商環境，是保本、保命！」

假若當日揸咗恒隆股票的小股東，聽得明走得切，咁就應可以避免一劫，執返身彩，否則就……唉！

當日老陳閃咗「紅燈」之後，大家仍有一個機會甩身。因佢參加最後一次董事會後，市場仍非常樂觀，股價不但冇跌，更攀上近月新高，恒隆地產股價超過9元，恒隆集團（010）股價更接近10元，看似一片好景，但如今回望，當然是「走得摩冇鼻哥」！

記得在4月底時，陳氏父子接受訪問，仍笑容燦爛表示「未來只會比同業好，不會比同業差」，又話「內房不再是競爭對手」。

純利急跌 大減派息

豈料僅僅過咗3個月，上月公布業績時晴天霹靂，小股東個個眼都凸埋，皆因恒隆系純利大跌，恒隆集團純利跌47.2%至8.88億元；恒隆地產更大鑊，純利跌55.7%至10.61億元。

業績差成咁，尤其恒隆地產大減派息，股民點會唔雞飛狗走，即時令股價插水？由陳啟宗1月底宣布退休至今，恒隆系股價蒸發逾三成，你係股東會點諗？

我嘅直覺係——老陳其實在考驗阿仔應變災難能力。因老陳咁精明，掌握咁多數據，冇理由唔知業績將會如何。在咁大「挑戰」下交棒畀從未獨當一面的阿仔，一定有「苦心」！集團行政總裁盧韋栢坦言：「未來前景睇唔通，唔敢望得太遠，逆風會好強！」（即唔使慌會好轉！）

我非常同情陳文博，呢支「棒」簡直係「火棒」！

資深傳媒人 曾智華