此时不斩租更待何时｜曾智华

两年半前笔者屋企附近有个年轻创业者阿S，一个人租了一间小铺经营食店，日日夜夜勤勤恳恳地捱。基于出品质素唔错，价钱合理，慢慢做出口碑，累积了不少熟客，我正是其中之一。

每日黄昏经过，皆见橱窗挂出的食物卖得八八九九，暗暗替佢高兴。因这个年头的年轻人，有这种踏实默默苦干精神的并不多。街坊支持阿S，显示民心所向。

业主想加租「大返转头」

上周笔者又去帮衬，S仔皱晒眉头话：「碌Sir想问你意见，间铺3年约已经过咗两年半，刚刚业主来电，话好多客想租，若果想续约就要加租3成，否则就会收返间铺……」

S仔做食物店叻，但同业主「玩梭哈」，肯定未够班。家阵条街啲铺头执吓一间执吓又一间，附近大把空铺，呢个时候狮子开大口加3成？会唔会离谱咗啲？既然问到我，我就直接提议：「话畀业主听加3成冇得做，唔租喇，执咗佢算喇。」

S仔照我指示「大」业主，果然中正要害，翌日业主WhatsApp就话：「咁啦，租生不如租熟，我都唔想换新客，唔知佢乜人，不如加1成半啦。」

摆明脚软！S仔又问点对应？我答：「话佢知市况咁差，人人执笠，我都觉前景黯淡难捱，不如去打工。若果你减1成租，我就考虑吓续唔续约啦。否则你可以放盘嘞，我做埋呢半年就执笠喇。」 结果业主使出「泥鳅功」，死典烂典，但求加少少就收手。

不过，个人两年多观察，S仔的专业拼搏精神加上出品质素，绝对可再上一层楼，故此应该在能力范围之下扩充。如今一街都吉铺，绝对是「租客市场」，只要够胆还价，可能一斩就斩一半租金，正所谓此时不斩更待何时？

有实力可趁机更上一层楼

我咁讲：「S仔，睇形势你可企硬要求减租，若然业主肯减，就再花三两年时间培养更多熟客，反正年轻，时间在你一边。假若业主拒绝，我觉得都系一个良好契机试试自己扩张实力，就在附近搵间大啲嘅铺，放心熟客一定不会流失。」

做生意几时进、几时退，非常讲客观形势。只要生意有根基，客路足够，趁业主冇「牙力」，绝对是更上一层楼的好时机！

资深传媒人 曾智华