港股上周假突破後又打回原形│古天后

7月16日，大致多雲，間中有驟雨及狂風雷暴，下午短暫時間有陽光。自周末發生美國前總統特朗普(侵侵)被槍擊案後，其選情不僅睇高一線，市場幾乎已認為侵侵將重返白宮。睇返侵侵在任期間，美股稍有風吹草動，即大為緊張，被市場視為保衛美股長升長有嘅守護者。美股周一做好，道指再創收市新高，標指則盤中破頂。道指收市升210點或0.53%，報收40211；標指升15點及0.28%，報收5631；納指則升74點或0.4%，報收18472。

侵侵相關概念股落鑊

重磅股份中，蘋果公司股價升1.7%，收報234.4美元，創歷史新高，即市破頂高見237.23美元，升幅更達2.9%，主要大摩唱好人工智能(AI)將成為刺激iPhone及iPad付運量催化劑，並將其目標價大幅提升26%至273美元。Netflix及Alphabet股價分別上揚1.4%及0.8%；即使侵侵曾公開表示，Meta創辦人朱格伯格曾於上屆美國總統選舉中舞弊，揚言重返白宮後要將其重送監獄，但Meta股價僅跌0.5%，盤後則回升0.2%。而侵侵相關概念股則落鑊，侵侵創辦嘅Trump Media & Technology Group (DJT)股價爆升31.4%；Tesla喺舵手馬斯克表態支持侵侵後，股價盤中最多升7%，收市仍升1.8%。由於侵侵曾公開支持加密貨幣市場發展，比特幣價格升逾6%；相關股份亦受追捧。

上周鮑爺(鮑威爾)於國會聽證會已放鴿，隔晚再重申今年第二季度通脹已經取得更多進展，最近3項通脹數據「相當不錯」，而通脹回落嘅進展，確實增強FOMC對通脹將朝着目標2%進一步回落信心，並指唔需要到通脹回落至2%以下先開始減息。加上市場認為侵侵回朝後，將減稅及放寛財政攻策，美國30年期長債孳息一度抽高8.18個基點，至4.4777厘，係自1月以來首次超過2年期債息；美國10年期債息漲7.2個基點，高見4.257厘。

不過侵侵回朝，令市場擔心中美關係持續惡化，反映中概股嘅中國金龍指數下跌3.6%，港股噚日跌近300點後，於ADR再跌200點，夜期亦跌179點，黑期今早跌幅相若，跌至17800水平。反映恒指今日將低開，跌回20日線17925之下。上周四及五大市升勢大有可能又放煙化，恒指由17376回升近千點至18317，回調浪一般喺強勢市下，回調黃金比0.382，即17957或0.5即17846已足夠，不過港股一直為弱勢市，回調0.618即17735甚至0.764至17598亦唔係乜嘢咁出奇嘅事。回調至呢兩個水平，即係下破20日線，再失10日線17823及5日線17827亦好大機會，回到黃金比0.5位附近再失守，有心理準備進一步跌至17735及17598，即17600水平方有較大支持，如能守位，即100日線17522及250日線17490企穩，再做多個底後組織升浪亦有機會。

港股乏資金支持猶如棄嬰

過港股屢次回調咁深，加上喺升市成交未見顯著增加，未再有新資金流入，港股多次於日線保力加通道頂掉頭，散戶高追三番四次被割韭菜，咁嘅市場，試問邊個願意坐貨？一個缺乏資金支持嘅市場，等同一個棄嬰，港股有幾難搞大家心水有數。即使美股估值已唔便宜，但相對港股呢個棄嬰，美股長升長有，醒目資金捨難取易，又點會肯重返港股呢個地獄級市場。

古天后