恒指需重上10日線 方能擺脫跌勢｜古天后

6月12日，天氣炎熱，短暫時間有陽光，有幾陣驟雨。美國聯儲局召開議息會議之際，市場憂慮歐洲政局不穩，美股隔晚喺銀行股被拋售下受壓，道指早段曾跌421點，低見38446點；標指曾跌0.63%，納指曾跌0.49%，不過後來扭轉跌勢，標指跟納指倒升並續創收市新高，主要因為蘋果帶動科技股再創歷史新高。道指收市跌幅縮至120點或0.31%，報38747點；標指倒升14點或0.27%，報5375點；納指倒升151點或0.88%，報17343點。

蘋果創新高 成表現最好道指股份

蘋果公司勁升7%，成為表現最好道指股份，創歷史新高。雖然市場普遍認為蘋果日前舉行嘅全球開發者大會無乜驚喜，但有分析員相信，加入人工智能（AI）有助加快iPhone換機周期。至於另外兩隻備受市場關注嘅重磅股，Tesla股價跌1.8%，Nvidia回吐0.7%。銀行股沽壓亦大，花旗及摩通分別跌3.7%及2.6%，美國運通跌3.4%，為表現最差道指成份股。加密貨幣比特幣一度跌5%，拖累相關股份MicroStrategy及Coinbase股價分別跌2.8%及2.3%。

法國總統馬克龍嘅辭職傳聞一度刺激當地10年期債息彈高10個基點至3.32厘，與同年期德債孳息差距擴大至去年10月嚟最大，隨後接近馬克龍人士否認相關傳聞。不過喺歐洲政局轉趨不穩定下，歐洲三大股市均告下跌。

雖然標指跟納指最近屢創新高，但摩通交易部門美國市場情報主管Andrew Tyler警告，一旦核心通脹按月升幅逾0.4%，超過市場平均估計升0.3%，將觸發標指下調1.5%至2.5%。不過佢亦補充呢個情況出現概率只有5%，通脹數據公布後嘅市場反應，或因聯儲局主席鮑爺議息後記者會嘅言論而逆轉。今晚美國除咗有通脹數據公布，香港凌晨兩點嘅議息結果及會後聲明，先至係今晚嘅戲肉。議息前夕，美國10年期債息最多下跌7.7個基點，至4.394厘，不過美元強勢，美滙指數一度升0.29%至105.459。

恒指守住萬八關極為重要

反映中概股表現嘅金龍指數跌1.59%，拖累港股於夜期及ADR持續下跌，恒指及夜期跌至18000邊緣，夜期更一度失守18000大關。留意科指昨日仍守50日線約3700水平，亦未穿前底3684，若然今日續守，睇下能否助力恒指守住萬八大關。美團（3690）公布擬於公開市場回購不超過20億美元股份，而騰訊(700)亦持續進行回購，呢兩隻重磅股嘅回購，成為穩住大市嘅重要助力。不過恒指10日線（18390），今日或將進一步下移至18350至18370，已逼近5日線（18377），一旦大市今日仍未能回升，則10日線將跌穿5日線，形成繼跌穿20日線（18768）後嘅第二個死亡交叉。而恒指需盡快重返10日線之上企穩，方能擺脫向下趨勢。今日大市能否扭轉跌勢，守住昨日低位17994及萬八關極為重要。

古天后

---

由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊 https://bit.ly/4csd4qL

緊貼最新最快新聞資訊，請立即下載星島頭條App：https://bit.ly/3Q29Vow