胡子彤單身4年講拍拖面紅：唔識同女仔相處憑「十二少」彈起獲女Fans求做男友嚇親丨獨家

2024-06-08 07:00

氣勢強勁的《九龍城寨之圍城》直逼1億票房，連帶「十二少」胡子彤亦人氣急升，入行8年，終見證成名威力，IG followers倍增。對於劉俊謙獲封「國民老公」，子彤冇眼紅，覺得「一樣有人鍾意胡子彤。」不過因單身4年，少近女色，所以完全不懂應對女Fans的瘋狂示愛，更坦言已唔識跟女仔相處，訪問當日被女記者及女工作人員圍住更講到面紅，Cute到不得了，終於明白Fans點解讚佢可愛。採訪：杜杜攝影：朱偉彥裝:TANAKA@ithk、AMI Alexander Mattiussi@ithk

子彤擇偶冇外形及年齡要求，最重要可以好好相處。

子彤由最初不知從何入手演繹「十二少」，到導演鄭保瑞鼓勵「放膽去演」，終感受到努力成果，「只要盡全力做好眼前嘅嘢，之後帶畀你嘅嘢，永遠預計唔到，如果望住個結果去做，去唔到個結果就會失望。」這番話是數年前古老闆跟他講，當時他不明白，「即係點呀？！又要望遠又要望近，𠵱家開始知。」另外，子彤亦好記得一句說話，「我做運動員時，老竇同我講『專心做好一樣嘢就得』，入行冇耐老闆都同我講同一番說話，記到𠵱家。」在子彤眼中，古天樂是好老闆，亦是好長輩，「可能見到佢膚色同個樣，覺得佢好嚴肅好惡，其實佢近年好願意同我哋接觸，聽我哋嘅意見，同我哋分享。」

子彤感激老闆古天樂經常提點。

子彤跟家人關係密切，胡爸爸（後左一）愛講道理教仔。

子彤再跟黃徳斌合作，在對方身上學識對任何人都要真誠。

「可唔可以做我條仔？」

劉俊謙憑「信一」獲封「國民老公」，子彤好戥對方開心，「好似好耐冇出過一個電影明星，走到阿謙出嚟好開心！有1個自然有第2個，我哋就可以行到出去。」子彤坦認運動員出身，以往會將勝負放得好重，但現在識得調節心態，「入咗行如果將個爭勝心擺得好重會好辛苦，以前我會成日問『點解唔係我』，𠵱家會問『點解會係佢先』，係佢一定有原因。」到各地宣傳期間見劉俊謙大受歡迎，他想法一樣正面，「非常之戥佢高興，但唔可以忽略有人鍾意『十二少』、鍾意胡子彤，仲有班人鍾意我，我會輕鬆、舒服同豁達好多，呢個係今次演出最大成長同得着，繼續做好要做嘅嘢，應驗返老闆一番話，永遠唔知眼前呢樣嘢會帶畀你乜嘢。」

「十二少」可以有太多演法，子彤拍攝初期曾搵唔到方向。

對於「信一」較「十二少」受歡迎，子彤替劉俊謙開心。

要子彤自度封號，他完全諗唔到，「仍然係想做偶像派實力演員。（做「國民偶像」？）「國民偶像」好大喎！唔好，觀眾話事，我真係冇所謂。」他又興奮透露IG 粉絲暴增，「講得㗎？！我怕醜呀，都升咗一倍，真係好開心，估唔到會有咁嘅增長。」（最新數字約4.3萬）由於他少玩社交平台，有啲頭痕。「多咗fans都花多咗時間處理，唔係好適應同佢哋接觸。」講到最深刻肯定是被粉絲示愛，「謝票時問我可唔可以做佢條仔，呆咗，好深刻，冇諗過有人會用可愛嚟形容我，又問可唔可以做佢老公、男朋友！」問到接唔接受同粉絲拍拖？他一臉尷尬：「你呢個問題咁難答，佢哋繼續支持我嘅作品就OK。」

子彤IG最新followers有4.3萬。

子彤出席謝票場獲粉絲夾道歡迎，令他好感動。

擇偶最重要相處冇問題

一講拍拖子彤即面紅變怕醜仔，原來他已單身4年，承認以往是「戀愛腦」，「公司都知，我一拍拖就變另一個人，𠵱家唔知，太耐冇拍拖。」他亦由年前恨有女友，到目前心態已變，「發覺好享受同朋友一齊，𠵱家唔識同女仔相處。」他坦認太耐冇近女色，亦曾嘗試搵對象，「出去同朋友聚會時識多啲朋友，以前我真係冇，淨係做運動好宅㗎！可以為咗練波、瞓覺唔同女朋友出街。」他又承認性格問題難搵對象，「唔容易搞，都好麻煩，情緒又0至100。」他認為圈外人未必理解工作情況，跟圈中人拍拖更適合，亦不擔心跟圈中人拍拖有壓力，「同邊個拍拖都一定有壓力，冇話一定要圈內定圈外，我成日強調要長時間發展，相處係最緊要。」

子彤要時間適應跟粉絲相處，被示愛仍會面紅。

子彤笑言近年接觸最多的女仔，是姪女花豬。

講到現實同「十二少」一樣冇拖拍，子彤忽然爆料：「導演話本身係有嘅，但唔講得！」他期待《城寨》前傳及續集繼續有兄弟情和動作戲外，都加啲愛情戲，「都要唞吓氣，談情說愛都幾開心。」他更推測未來「十二少」女友的性格，「我覺得好兩極，一係江湖中人好Man嘅，同我一樣好有雷，一係就超級單純，乖乖嘅，估唔到世界上有咁嘅人，我估呢兩個走向。」