胡子彤单身4年讲拍拖面红：唔识同女仔相处 凭「十二少」弹起获女Fans求做男友吓亲丨独家
2024-06-08 07:00 
气势强劲的《九龙城寨之围城》直逼1亿票房，连带「十二少」胡子彤亦人气急升，入行8年，终见证成名威力，IG followers倍增。对于刘俊谦获封「国民老公」，子彤冇眼红，觉得「一样有人锺意胡子彤。」不过因单身4年，少近女色，所以完全不懂应对女Fans的疯狂示爱，更坦言已唔识跟女仔相处，访问当日被女记者及女工作人员围住更讲到面红，Cute到不得了，终于明白Fans点解赞佢可爱。采访：杜杜 摄影：朱伟彦 装:TANAKA@ithk、AMI Alexander Mattiussi@ithk
子彤由最初不知从何入手演绎「十二少」，到导演郑保瑞鼓励「放胆去演」，终感受到努力成果，「只要尽全力做好眼前嘅嘢，之后带畀你嘅嘢，永远预计唔到，如果望住个结果去做，去唔到个结果就会失望。」这番话是数年前古老板跟他讲，当时他不明白，「即系点呀？！又要望远又要望近，𠵱家开始知。」另外，子彤亦好记得一句说话，「我做运动员时，老窦同我讲『专心做好一样嘢就得』，入行冇耐老板都同我讲同一番说话，记到𠵱家。」在子彤眼中，古天乐是好老板，亦是好长辈，「可能见到佢肤色同个样，觉得佢好严肃好恶，其实佢近年好愿意同我哋接触，听我哋嘅意见，同我哋分享。」
「可唔可以做我条仔？」
刘俊谦凭「信一」获封「国民老公」，子彤好戥对方开心，「好似好耐冇出过一个电影明星，走到阿谦出嚟好开心！有1个自然有第2个，我哋就可以行到出去。」子彤坦认运动员出身，以往会将胜负放得好重，但现在识得调节心态，「入咗行如果将个争胜心摆得好重会好辛苦，以前我会成日问『点解唔系我』，𠵱家会问『点解会系佢先』，系佢一定有原因。」到各地宣传期间见刘俊谦大受欢迎，他想法一样正面，「非常之戥佢高兴，但唔可以忽略有人锺意『十二少』、锺意胡子彤，仲有班人锺意我，我会轻松、舒服同豁达好多，呢个系今次演出最大成长同得着，继续做好要做嘅嘢，应验返老板一番话，永远唔知眼前呢样嘢会带畀你乜嘢。」
要子彤自度封号，他完全谂唔到，「仍然系想做偶像派实力演员。（做「国民偶像」？）「国民偶像」好大喎！唔好，观众话事，我真系冇所谓。」他又兴奋透露IG 粉丝暴增，「讲得㗎？！我怕丑呀，都升咗一倍，真系好开心，估唔到会有咁嘅增长。」（最新数字约4.3万）由于他少玩社交平台，有啲头痕。「多咗fans都花多咗时间处理，唔系好适应同佢哋接触。」讲到最深刻肯定是被粉丝示爱，「谢票时问我可唔可以做佢条仔，呆咗，好深刻，冇谂过有人会用可爱嚟形容我，又问可唔可以做佢老公、男朋友！」问到接唔接受同粉丝拍拖？他一脸尴尬：「你呢个问题咁难答，佢哋继续支持我嘅作品就OK。」
择偶最重要相处冇问题
一讲拍拖子彤即面红变怕丑仔，原来他已单身4年，承认以往是「恋爱脑」，「公司都知，我一拍拖就变另一个人，𠵱家唔知，太耐冇拍拖。」他亦由年前恨有女友，到目前心态已变，「发觉好享受同朋友一齐，𠵱家唔识同女仔相处。」他坦认太耐冇近女色，亦曾尝试搵对象，「出去同朋友聚会时识多啲朋友，以前我真系冇，净系做运动好宅㗎！可以为咗练波、瞓觉唔同女朋友出街。」他又承认性格问题难搵对象，「唔容易搞，都好麻烦，情绪又0至100。」他认为圈外人未必理解工作情况，跟圈中人拍拖更适合，亦不担心跟圈中人拍拖有压力，「同边个拍拖都一定有压力，冇话一定要圈内定圈外，我成日强调要长时间发展，相处系最紧要。」
讲到现实同「十二少」一样冇拖拍，子彤忽然爆料：「导演话本身系有嘅，但唔讲得！」他期待《城寨》前传及续集继续有兄弟情和动作戏外，都加啲爱情戏，「都要唞吓气，谈情说爱都几开心。」他更推测未来「十二少」女友的性格，「我觉得好两极，一系江湖中人好Man嘅，同我一样好有雷，一系就超级单纯，乖乖嘅，估唔到世界上有咁嘅人，我估呢两个走向。」
《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
最新回应