75歲許紹雄唔羨慕73歲李龍基有「嫩妻」：好辛苦㗎！銘記前輩教誨勿亂媾女玩死自己丨獨家

2024-06-07 07:00

75歲許紹雄（Benz雄）於TVB劇《家族榮耀之繼承者》中與陳靜（Dada）演「老夫少妻」，咁啱何伯及其真愛日日都有新聞，網民樂於Follow瘋狂恥笑，Benz雄覺得「何伯之亂」命中注定，更爆笑認為何伯可能鍾意煩。另外，他一直對老婆呵護備至，零歪念，皆因他銘記前輩的「牛奶論」，即想飲牛奶唔一定要養隻牛，去買就可以。對於相識多年73歲李龍基有「嫩妻」陪伴，Benz雄一啲都唔羨慕，更笑他「捉蟲」（即自己攞嚟衰）。採訪：方騫平攝影：羅安強

75歲許紹雄好快樂，又享受工作，完全唔諗退休。

許紹雄有開心人生。

許紹雄教天下男人飲「牛奶」唔使養隻牛。

許紹雄自稱呃飯食呃咗幾十年。

許紹雄認為前輩的「牛奶論」終身受用。

許紹雄在新劇中跟35歲的Dada有唔少甜蜜互動場口，老夫少妻好鬼冧豬！問到面對性感女神有冇被電暈？Benz雄答得風趣：「哎呀！我視力正常冇黃斑病，後生女個個都會望多兩眼啦，不過，佢就電我唔到，我成日搞笑，只係搞到佢忍唔住笑。同後生女合作，我哋冇代溝，都OK。」

TVB劇《家族榮耀之繼承者》中與陳靜（Dada）演「老夫少妻」。

許紹雄、陳靜有好多甜蜜互動場口。

許紹雄哄得Da Da成日笑。

許紹雄和Da Da冇代溝。

近年許紹雄戲中嘅另一半，Da Da算係最年輕一位。

戲中許紹雄好enjoy娶「少妻」。

許紹雄飾演看淡權力及名利的丘家大兒子守仁。

有指戲中羅嘉良比許紹雄更老貌。

阿佘上完契先同老婆講

Benz雄因為佘詩曼而接拍此劇：「總監製梁家樹搵我時仲度緊期，阿佘就補咗個電話嚟，話『我做你個女喎！你仲唔答應？』咁我梗係想佢做我個女啦，我哋早已有父女嘅感覺，有啲嘢好奇妙，人與人之間要講緣份。拍劇前，我突然向佢提出『不如我哋上契咯？』佢秒答話好！我哋契完先同老婆、囡囡講，佢哋都讚好。」問會否擔心被外間錯誤解讀「契女」兩字？Benz雄強調冇有怕，「我哋有正式上契㗎！佢係我第一個契女。哈…我哋呢啲唔係李龍基同何伯嗰啲。」語畢，Benz雄即戴返頭盔：「佢哋呢啲都係正經嘅。」

戲裡戲外跟阿佘關係好好，更上埋契。

兩人同阿佘都有對手戲。

拍《使徒行者》時兩人已好老友。

阿佘49歲生日會，契爺Benz雄係席上客。

Benz雄愛女許惠菁及契女阿佘英文名都叫Charmaine，齊跟子華神茶聚。

《絕代商驕》三人組再合體！

飲「牛奶」唔使養隻牛

講到相識多年的李龍基，Benz雄欣賞對方好犀利，「以前拍戲同佢吹水，佢話『一晚走幾場，啲錢一路係咁塞落佢個袋！』哎呀！有啲咁好命嘅人。」追問會否佩服基哥身邊一直有咁多後生女？Benz雄表示對呢方面冇了解，但坦言唔係好事：「其實呢啲係苦命，好辛苦㗎！仲乜做到自己咁辛苦啫？第日見到會同佢講『捉蟲』。」Benz雄好記得年輕時，曾被前輩提點：「唔使起牛棚養牛飲牛奶咁笨，鍾意飲奶可以隨意去便利店買，日日飲唔同牌子都得，你話幾方便呢？當然唔好亂飲牛奶啦，但要飲咪去便利店囉，『牛奶論』亦成為婚姻座右銘。」至於被全城圍插的「何伯事件」，Benz雄冇話支唔支持，同樣認定係命水：「命中注定怨不得！可能呢啲係佢福份，到好攰時咪要承擔個攰囉，我唔係用老人家角度睇，只係覺得唔好搵啲咁複雜嘅嘢搞，明知搞落去會好煩，咁搞嚟做乜？我好懶唔好煩我，但每人性格唔同，可能何伯鍾意複雜呢？」

許紹雄以「捉蟲」形容73歲李龍基跟36歲王青霞的關係。

李龍基、Chris係「捉蟲」情侶。

「何伯之亂」曾是城中熱話，但已被網友嫌棄。

「何伯之亂」熱度漸減。

何伯及新何太不停發功。

自稱呃飯食呃咗幾十年

Benz雄與新加坡籍太太龍嬿而結婚32年，26歲高才生愛女許惠菁啱啱出嫁，而繼子又做埋爸爸，Benz雄相當滿足：「有孫女抱又多咗半邊仔，𠵱家同個女及女婿一齊住，囡囡會港、星兩邊走，繼子喺澳洲，佢哋都好孝順。」雖然Benz雄仔大女大生活無憂，但卻無意退休，他非常抗拒：「千祈唔好諗，諗嗰個死嗰個，做人要有寄托，𠵱家幾開心，開工有錢收又有得玩，唔好做得咁辛苦咪得囉。」另外，Benz雄背景好猛料，祖先為廣州4大鹽商之首嘅許拜庭，太公許應騤官居一品，係慈禧太后的重臣，姑婆為中國近代作家魯迅夫人許廣平。對此，他笑說：「佢哋係勁人，我呢啲冇得比，我睇書會瞓著，睇劇本就叻。不過，又唔會有壓力嘅，托賴喺演藝上呃到啲人，我成日同人講『呃飯食幾十年，求求其其又搞掂。』有時睇返啲演出，都會嫌唔夠完美。」