張文傑自爆暗黑戀愛史唔識𠱁女長期被鬧 38歲爆肌怕醜男唔敢同女友齊睇AV丨獨家

2024-06-06 07:00

電影《九龍城寨之圍城》票房已突破9000萬，演員亦人氣急升，張文傑（German）飾演的「四仔」為尋找女友身影日而繼夜睇AV，戲內情深，戲外就單身2年多，38歲German聲稱跟「四仔」一樣重情，只是不懂浪漫經常被舊愛投訴，例如情人節去燒嘢食貪唔使排隊。講到劉俊謙被封「國民老公」，大讚好兄弟的確靚仔的German笑言：「咁我係『國民殺手』，用眼神殺人。」。採訪：杜杜攝影：朱偉彥形象及化妝:@__frimousse 髮型:@akichoi@theattichongkong 服裝:@harrisonwong場地:@swack.team

German做幕前外，仍會堅持做武術指導，夢想是有自導自演作品。

原來German試鏡後曾經有機會飾演「王九」，他未有深究角色安排，有得參與已覺幸福，但若然有得揀，他也想演好玩的「王九」，「佢喺片場鍾意點玩、點笑都得，冇人可以管佢，亦唔應該撳住佢。招式上亦可以好誇張好放，冇框架框住個角色，其他角色要有少少保留，跟住角色啲招式去打，一定有規限。」

3歲習武的German，01年入行擔任動作設計和演員替身，後轉到幕前。

接受唔到女友性感

「四仔」為尋找被騙去日本拍AV的女友瘋狂睇鹹片，German笑言當然有睇過，「唔會似『四仔』咁睇法，嗰個病態嚟。（有冇收藏？）冇，𠵱家仲有人收藏『四仔』㗎咩，上網睇啦！」問到有否鍾情邊位AV女優？German係冇嘅，「好多朋友都有，我又冇喎！有啲名我記得，但唔會特登搵嚟睇，我都好少偶像。」以往拍拖會去睇戲，但就未試過同女友一齊睇「四仔」，「我係個好傳統嘅人，細個家教太嚴，我都幾守舊，會怕醜㗎！」保守的他連女友打扮性感亦接受唔到，「我睇係OK，但如果女朋友好性感咁行出街好多人望住，唔係幾好喎，唔算守舊，基本啦！」

「四仔」大部份蒙面演出，German完全不擔心觀眾認不到他。

「四仔」重情重義角色超討好，German覺得自己好有福氣。

曾戀圈中人現單身

German有10隻手指數得晒的戀愛經驗，亦曾戀幕前人，單身2年多的他，完全唔心急拍拖，「呢段時間好多嘢做，忙完電影又忙住搞自己公司，都冇時間畀自己，根本冇空間同人交往，開咗公司要承擔好多責任，真係負擔唔到太多額外責任。」雖然自稱拍得住「四仔」一樣情深，German仍被舊愛們投訴，「我好深愛女朋友，似『四仔』默默喺後面陪伴，撐住睇住，但唔係好浪漫，好識搞氣氛，成日俾女朋友鬧，話我冇時間陪佢，話我唔浪漫，紀念日又唔記得。」他坦認最叻𠱁女招數只是給女友生日驚喜，「我好懶出街，好怕排隊，情人節嗰啲食飯要book枱要排隊，搞唔掂情願喺屋企煮，但我煮嘢又唔叻，求其煎塊牛扒，烚個菜，哈哈！咁就叫燭光晚餐，所以咪成日俾人鬧囉！兩個人燒吓嘢食咁，我覺得幾浪漫，但係隔離嗰個覺得燒嘢食？！」

German去年投資7位數跟友人成立製作公司，開辦課程訓練動作人才。

German公司開幕，堂兄張家輝亦有到賀。

自封做「國民殺手」

「城寨四少」個個打得，German笑言玩圍揪必定是劉俊謙取勝，「因為佢癲㗎！真人都癲，佢嗰種癲我哋係意想不到，鏡頭內外都有啲搞笑嘢，講打交，論技術佢當然唔係最叻，可能佢會出啲陰招贏我哋，佢條友傻傻哋，唔小心會俾佢殺個措手不及。」對於阿謙被封「國民老公」，他大讚兄弟實至名歸，「大佬佢咁靚仔，個造型好有味道，唔係個個着到呢啲衫handle到。（特別係個髮型？）係！試吓擺喺我度！」要他自度封號，他想了想就話：「我係『國民殺手』，殺手又唔一定打嘅，用眼神殺人都得，講吓笑咋！」

German跟大隊到康城出席影展，首映結束時感動到喊。

2021年，German接受本報訪問，提到離世的陳木勝導演亦忍唔住喊。

希望續集搵返女友

38歲才憑「四仔」彈出，German認為演員路先正式開始，亦興奮期待未來條路點樣行，「以前儲咗好多經驗，去到今日終於有人知道邊個係張文傑！但係動作上我希望堅守返自己信念，真係可以幫到新一代入行，必須要有個好嘅培育。」問到做男主角是否目標之一，German好清楚自己位置，「冇諗係咪做男主角，知自己唔係男主角樣，由細到大都覺得我點做男主角呀？！只期待有咩好玩製作、角色。」電影將開拍兩部續集《九龍城寨之龍頭》及《九龍城寨之終章》，German當然想參與，更期望「四仔」能拍成獨立故事，「『四仔』係個超級悲劇人物，佢個背景好清晰，多謝賜呢個角色畀我玩。」他未知「四仔」在兩套續集的發展，但期望可以搵返女友，問到想邊個演女友，「Gigi（女神梁詠琪）囉！」