张文杰自爆暗黑恋爱史唔识𠱁女长期被闹 38岁爆肌怕丑男唔敢同女友齐睇AV丨独家

2024-06-06 07:00

电影《九龙城寨之围城》票房已突破9000万，演员亦人气急升，张文杰（German）饰演的「四仔」为寻找女友身影日而继夜睇AV，戏内情深，戏外就单身2年多，38岁German声称跟「四仔」一样重情，只是不懂浪漫经常被旧爱投诉，例如情人节去烧嘢食贪唔使排队。讲到刘俊谦被封「国民老公」，大赞好兄弟的确靓仔的German笑言：「咁我系『国民杀手』，用眼神杀人。」。采访：杜杜摄影：朱伟彦形象及化妆:@__frimousse 发型:@akichoi@theattichongkong 服装:@harrisonwong场地:@swack.team

German做幕前外，仍会坚持做武术指导，梦想是有自导自演作品。

原来German试镜后曾经有机会饰演「王九」，他未有深究角色安排，有得参与已觉幸福，但若然有得拣，他也想演好玩的「王九」，「佢喺片场锺意点玩、点笑都得，冇人可以管佢，亦唔应该揿住佢。招式上亦可以好夸张好放，冇框架框住个角色，其他角色要有少少保留，跟住角色啲招式去打，一定有规限。」

3岁习武的German，01年入行担任动作设计和演员替身，后转到幕前。

接受唔到女友性感

「四仔」为寻找被骗去日本拍AV的女友疯狂睇咸片，German笑言当然有睇过，「唔会似『四仔』咁睇法，嗰个病态嚟。（有冇收藏？）冇，𠵱家仲有人收藏『四仔』㗎咩，上网睇啦！」问到有否锺情边位AV女优？German系冇嘅，「好多朋友都有，我又冇喎！有啲名我记得，但唔会特登搵嚟睇，我都好少偶像。」以往拍拖会去睇戏，但就未试过同女友一齐睇「四仔」，「我系个好传统嘅人，细个家教太严，我都几守旧，会怕丑㗎！」保守的他连女友打扮性感亦接受唔到，「我睇系OK，但如果女朋友好性感咁行出街好多人望住，唔系几好喎，唔算守旧，基本啦！」

「四仔」大部份蒙面演出，German完全不担心观众认不到他。

「四仔」重情重义角色超讨好，German觉得自己好有福气。

曾恋圈中人现单身

German有10只手指数得晒的恋爱经验，亦曾恋幕前人，单身2年多的他，完全唔心急拍拖，「呢段时间好多嘢做，忙完电影又忙住搞自己公司，都冇时间畀自己，根本冇空间同人交往，开咗公司要承担好多责任，真系负担唔到太多额外责任。」虽然自称拍得住「四仔」一样情深，German仍被旧爱们投诉，「我好深爱女朋友，似『四仔』默默喺后面陪伴，撑住睇住，但唔系好浪漫，好识搞气氛，成日俾女朋友闹，话我冇时间陪佢，话我唔浪漫，纪念日又唔记得。」他坦认最叻𠱁女招数只是给女友生日惊喜，「我好懒出街，好怕排队，情人节嗰啲食饭要book枱要排队，搞唔掂情愿喺屋企煮，但我煮嘢又唔叻，求其煎块牛扒，烚个菜，哈哈！咁就叫烛光晚餐，所以咪成日俾人闹罗！两个人烧吓嘢食咁，我觉得几浪漫，但系隔离嗰个觉得烧嘢食？！」

German去年投资7位数跟友人成立制作公司，开办课程训练动作人才。

German公司开幕，堂兄张家辉亦有到贺。

自封做「国民杀手」

「城寨四少」个个打得，German笑言玩围揪必定是刘俊谦取胜，「因为佢癫㗎！真人都癫，佢嗰种癫我哋系意想不到，镜头内外都有啲搞笑嘢，讲打交，论技术佢当然唔系最叻，可能佢会出啲阴招赢我哋，佢条友傻傻哋，唔小心会俾佢杀个措手不及。」对于阿谦被封「国民老公」，他大赞兄弟实至名归，「大佬佢咁靓仔，个造型好有味道，唔系个个着到呢啲衫handle到。（特别系个发型？）系！试吓摆喺我度！」要他自度封号，他想了想就话：「我系『国民杀手』，杀手又唔一定打嘅，用眼神杀人都得，讲吓笑咋！」

German跟大队到康城出席影展，首映结束时感动到喊。

2021年，German接受本报访问，提到离世的陈木胜导演亦忍唔住喊。

希望续集搵返女友

38岁才凭「四仔」弹出，German认为演员路先正式开始，亦兴奋期待未来条路点样行，「以前储咗好多经验，去到今日终于有人知道边个系张文杰！但系动作上我希望坚守返自己信念，真系可以帮到新一代入行，必须要有个好嘅培育。」问到做男主角是否目标之一，German好清楚自己位置，「冇谂系咪做男主角，知自己唔系男主角样，由细到大都觉得我点做男主角呀？！只期待有咩好玩制作、角色。」电影将开拍两部续集《九龙城寨之龙头》及《九龙城寨之终章》，German当然想参与，更期望「四仔」能拍成独立故事，「『四仔』系个超级悲剧人物，佢个背景好清晰，多谢赐呢个角色畀我玩。」他未知「四仔」在两套续集的发展，但期望可以搵返女友，问到想边个演女友，「Gigi（女神梁咏琪）罗！」