張松枝常被15歲囝囝取笑：又做茄喱啡唔介意《九龍城寨》戲份被刪參與已開心丨獨家

2024-05-30 07:00

張松枝有份演出的電影《九龍城寨之圍城》和《查無此人》同時上映，雖然戲份都不算多，但有份參與已很開心。55歲松枝有個15歲已有180cm高的囝囝，相處如朋友，親子活動是由囝囝提供自製試卷考他，又會經常取笑老竇：「又做茄喱啡！」，父子關係好Funny。採訪：杜杜

松枝拍戲唔強求戲份多少，「喺小型作品做過好多次主角，參與到《九龍城寨》已經好開心。」

2024年只過了半年，張松枝已有4套作品推出，包括早前上映的《盜月者》和《臨時劫案》，雖然每套戲份不多，但他已相當滿足，「做咗咁耐識得多人，幫吓手都好開心。」《九龍城寨》成績驕人，截稿前港澳票房突破8000萬港元，有3場戲被cut剩1場的松枝與有榮焉，更開心首度跟洪金寶合作，「有場同警察部一班外籍上司開會，佢哋向我施壓要收返城寨，另一場就係請『龍捲風』（古天樂）去差館傾，有啲敏感cut咗，但有機會同洪金寶大哥合作，都算留咗喺自己紀錄裹面。」另外，接《查》戲更為幫後輩，「幫到幾多得幾多，冇新人我之後都冇得做，淨係一班老鬼，觀眾會睇到悶！」

松枝在《臨時劫案》演劫匪「白頭蘭」。

松枝跟郭富城由電視合作到電影，開工似聚舊話當年。

松枝在《查無此人》飾演詐騙集團大老闆。

囝囝冇興趣做演員

松枝一家都很鍾意《九龍城寨》，連平日睇開超級英雄片的囝囝，都派任務給他，「佢叫我攞海報畀晒演員簽名，交咗功課啦！」松枝笑言讀中三的囝囝有舖癮，就是喜歡自製試卷畀老竇做，「全部科佢做定晒喺電腦，見我得閒就畀我做，我唔識佢會同我上堂，用白板同我講解，佢要話畀我知，讀書幾慘、幾辛苦。」他透露囝囝外形不俗，但完全冇興趣做幕前，「可能我同太太都幾高，所以佢唔太鍾意運動，都高過我有180cm，個樣都似我，佢唔睇電視，電影都係我捉佢去睇，想讀經濟。」他跟囝囝似朋友相處，所以經常被寸，「佢乜都同我講，仲會成日笑我『套套戲都咁，出一出咋！又做茄喱啡！』。」