李龍基自爆一生不缺女伴屋企對四面牆好難受硬撐65日曾萬念俱灰：驚自己過唔到

2024-04-22 06:00

李龍基細36年嘅未婚妻（Chris）王青霞，因涉逾期居留、使用虛假文書等被控7宗罪，現已還押於大欖女懲教所65日，案件押後至5月28日再訊。曾揚言唔再接受傳媒訪問的基哥近日突然變得高調，繼上周現身梁思浩主持的網台節目《娛樂好好玩》後，上周4晚再接受顏聯武主持嘅網台D100節目《霎時衝動》訪問，節目中大談對王青霞還柙後嘅心歷路程，認為搞成咁係上天安排，考驗他情比金堅。最爆當提及經典歌《It\'s a sin to tell a lie》，基哥更直言講大話係罪過，對於「兩公婆」被指係「大話精」，基哥淡定地自辯道：「我講唔講大話，我永遠覺得個天知、地知、我自己知...」訪問尾聲，顏聯武用網民留言「自編自導自演」作結，獲網民大讚主持人訪問技巧高，充滿智慧，句句誘導受訪者講出真相。

基哥接受資深DJ顏聯武訪問。

訪問喺上周4晚網台D100節目《霎時衝動》播出。

節目中基哥變開籠雀。

又破晒例講王青霞。

顏聯武追問基哥一啲深入話題。

基哥講乜嚇親顏生？

基哥否認自己滿口謊言。

李龍基直言講大話係罪過。

網民大讚顏聯武訪問技巧高。

對李龍基答案唔收貨。

顏聯武係網台D100金牌主持。

有把靚聲嘅顏聯武無論唱歌、主持及配音都掂。

上周基哥現身梁思浩主持的網台節目《娛樂好好玩》。

萬念俱灰驚過唔到
李龍基不忘在節目中宣傳創作嘅新歌《雲淡風輕》，表示係唱出心聲：「今時今日活到呢個年紀夠啦，要去Enjoy，唔好去衝，以前一晚走8場騷搞到瞓唔著，醫生話我精神崩緊到喺懸崖邊。」但他否認為𠵱家經歷而寫，又表示絕對信命，覺得唔好刻意去改變命運安排：「估都估唔到上天開呢個玩笑，初時好難受，反問點解會咁呢？相信係一個考驗，我要好努力咁去適應。」顏聯武追問他可有感到憂慮及恐懼？基哥直認有好多未知數會感到憂慮。基哥話自己從來都係一個好豁達嘅人，但呢段日子也曾亂過陣腳：「活到今時今日70多年 (73歲)，忽然有咁嘅事發生真係會亂，亂到有一個星期瞓唔到食唔到，做人好似冇晒目的唔想做人咁，萬念俱灰都驚自己過唔到。」他又向顏生承認一生都有女伴，從來未試過返屋企對住四面牆：「所以命運安排好得意，同王青霞2011年相識，邊度都同佢周圍去...好彩好快冷靜，諗清楚楚應該做乜唔做乜，(有冇反省點解會搞成咁？)有㗎，我只得一個答案，係上天安排，可能係上天安排嘅一個考驗，考驗我情比金堅，其實我好鍾意張德蘭嘅《情義兩心堅》。」

吹口琴拍新歌《雲淡風輕》MV。

基哥新歌《雲淡風輕》有份作曲。

基哥認為上天正考驗跟王青霞嘅感情。

王青霞官非令基哥頭痛。

多年來基哥跟王青霞有影皆雙。

李龍基保證唔會掉低Chris。

年前基哥高調陪Chris送畫畀楊梓菁。

王青霞為《三生有幸經典演唱會》畫畫。

兩人形影不離。

基哥早於2011年已認識王青霞。

謊言應該早被發覺
他又指近日多咗時間獨留家中，便拿出結他自彈自唱英文歌，基哥自爆：「盧宛茵教識我聽《It\'s a sin to tell a lie》，講大話係罪。」顏聯武則打蛇隨棍上追住問：「但睇留言話你係講大話嘅人，你點睇呢句？」基哥不慌不忙回應：「其實到我呢個年紀心態覺得冇乜所謂啦，因為佢哋唔認識我，都係估我係咁，佢估啫唔係真嘛，我講唔講大話，我永遠覺得個天知、地知、我自己知，若然我成日講大話，正如某巨星(甄妮)講過話我『好鍾意講大話扮豬食老虎』，我喺呢行幾十年生涯，(講大話)應該一早畀人發覺咗，唔𠵱家先發覺，真理冇需要辯...」顏聯武再問他事件中有何體會？基哥又引用口頭禪：「我唔係講大話，我對住燈火講，我發覺身邊嘅係真真正正朋友，有個加拿大返嚟朋友返嚟渡假，喺酒店見面同我傾偈時對住我喊，呢啲朋友去邊度搵？所以好感恩身邊有好多好好朋友，好感恩身邊朋友成日打嚟問候鼓勵及安慰我，叫我出嚟飲茶，識朋友中冇一個要保持距離，前港姐林穎嫻返嚟都同我食飯。」